گاڤ

وه‌زیرێ به‌رێ یێ په‌ترۆلێ یێ ئیراقێ راگه‌هاند كو پێشبینی دهێته‌ كرن ل دویماهیا ئه‌ڤ ساله‌ یان ده‌ستپێكا سالا 2024 دوباره‌ ده‌ست ب هنارتنا په‌ترۆلا كوردستانێ بهێته‌ كرن.

ئیبراهیم به‌حر ئه‌لعلوم ئه‌ڤرۆ ئێكشه‌مبیێ د پرێس كۆنفرانسه‌كێ دا راگه‌هاند؛ شاندێن توركى د حه‌فتیا بهێت دا ژ بۆ چاره‌كرنا بابه‌تێ هنارتنا په‌ترۆلا كوردستانێ دێ سه‌ره‌دانا ئیراقێ كه‌ن.

ئاشكرا ژى كر؛ پێشبینى دهێته‌ كرن ل دویماهیا ئه‌ڤ ساله‌ یان ده‌ستپێكا سالا 2024 دوباره‌ ده‌ست ب هنارتنا په‌ترۆلا كوردستانێ بهێته‌ كرن.

ئاماژه‌ ب وێ چه‌ندێ ژى كر "بزاڤێن به‌رده‌وام ژ لایێ هه‌ولێر و به‌غدا ڤه‌ بۆ دوباره‌ هنارتنا په‌ترۆلا كوردستانێ هه‌روه‌سا رێككه‌فتنێن باش بۆ به‌رهه‌مئینانا په‌ترۆلێ هه‌نه‌ و هه‌ولێر و به‌غدا شیاینه‌ گرێكێن مه‌زن ڤه‌كه‌ن".

ل رۆژا ئێكشه‌مبیێ 12ى ڤێ هه‌یڤێ، حه‌یان عه‌بدولغه‌نى وه‌زیرێ په‌ترۆلێ یێ ئیراقێ سه‌ره‌دانا هه‌رێما كوردستانێ كربوو و ل گه‌ل نێچیرڤان بارزانى سه‌رۆكێ هه‌رێمێ و مه‌سروور بارزانى سه‌رۆكوه‌زیرێ هه‌رێمێ كۆمببوو.

بۆ ده‌مێ دو رۆژان بوو هه‌ڤده‌م ل گه‌ل سه‌ره‌دانا وه‌زیرێ په‌ترۆلێ یێ ئیراقێ بۆ هه‌ولێرێ، به‌رپرسێن هه‌ولێر و به‌غدا دانوستاندن ل سه‌ر بابه‌تێ هنارتنا په‌ترۆلا كوردستانێ دكرن.

هه‌ر ژ 25ى ئادارا بۆرى هنارتنا په‌ترۆلا كوردستانێ ب رێكا توركیا پشتى بڕیارا ده‌سته‌یا ناڤبژیڤانیێ ل پاریس راوه‌ستیایه‌ و سه‌ره‌راى رێككه‌فتنا حكومه‌تا هه‌رێمێ و یا فیدرالى ل هه‌یڤا نیسانێ ل سه‌ر فرۆشتنا په‌ترۆلێ ب رێكا كۆمپانیا سومۆ یا ئیراقێ، تا نوكه‌ توركیا ل سه‌ر ده‌ستپێكرنا هنارتنا په‌ترۆلا كوردستانێ رازینه‌بوویه‌.