گاڤ

به‌نكا ناڤه‌ندى یا ئیراقى د ده‌هـ هه‌یڤێن ده‌ستپێكێ ژ ئه‌ڤ ساله‌ دا ژماره‌یه‌كا به‌نكان و كۆمپانیێن پاره‌گوهۆڕینێ ب نزیكى 120 ملیار دیناران سزاداینه‌.

ل گۆره‌ى خشته‌یه‌كێ به‌نكێ، د ده‌هـ هه‌یڤان دا، هه‌ر ژ هه‌یڤا كانوینا دوێ تا كو دویماهیا ئۆكتۆبه‌را سالا 2023، ژماره‌یه‌كا به‌نكان و كۆمپانیێن پاره‌گوهۆڕینێ ب 119 ملیار و 943 ملیۆن و 88 هزار و 300 دیناران هاتینه‌ سزادان.

هه‌روه‌سا 378 سزایێن كارگێرى ژى ل وان به‌نكان و سازیێن نه‌به‌نكى (كۆمپانیێن پاره‌گوهۆڕینێ) دناڤبه‌را دانا هوشداریێ، ئاگه‌هداركرن و مووله‌تدانێ دا هاتینه‌ سه‌پاندن.

هه‌ر ل گۆره‌ى وى خشته‌ى، ل هه‌یڤا نیسانێ پترین سزایێن دارایى هاتبوونه‌ سه‌پاندن كو گه‌هشتبوو 17 ملیار و 440 ملیۆن و 383 هزار و 447 دیناران ل گه‌ل 17 سزایێن كارگێرى، هه‌روه‌سا ل هه‌یڤا خزیرانێ كێمترین تێكرایێ سزایێن دارایى هه‌بوو كو 8 ملیار و 353 ملیۆن و 387 هزار و 476 دینار بوون ل گه‌ل 50 سزایێن كارگێرى.

خشته‌یى ناڤێن وان به‌نكان و كۆمپانیێن پاره‌گوهۆڕینێ یێن سزایێن دارایى و كارگێرى ل سه‌ر هاتینه‌ سه‌پاندن دیارنه‌كرینه‌.