وه‌زیره‌كا ئیسرائیلێ: چاره‌سه‌رى ده‌ركه‌فتنا فله‌ستینیایه ژ كه‌رتێ غه‌زه
بەلاڤ بکە
گاڤ
وه‌زیرا هه‌والگیریێ یا ئیسرائیلێ ئه‌ڤرۆ ئێكشه‌مبیێ دیاركر كو چاره‌سه‌ریا ره‌وشا غه‌زه ده‌ركه‌فتنا فله‌ستینیایه ژ وێرێ.
گیلا گاملیێل وه‌زیرا هه‌والگیریێ یا ئیسرائیلێ داخواز ژ جڤاكێ نێڤده‌وله‌تى كر "پشته‌ڤانیێ ل دوباره ئاكنجیكرنا فله‌ستینیان ل ده‌رڤه‌ى كه‌رتێ غه‌زه بكه‌ن ل شوینا ڤرێكرنا پاره‌یان بۆ دوباره ئاڤاكرنا غه‌زه".
رۆژنامه‌یا جیرۆسالم پۆست یا ئیسرائیلى به‌لاڤكریه؛ وه‌زیرا هه‌والگیریێ كو ئه‌نداما حزبا لیكۆده یا سه‌رۆكوه‌زیر بێنیامین نه‌ته‌نیاهۆى، پشته‌ڤانیێ ل دوباره ئاكنجیكرنا ب حه‌زا خۆ یا فله‌ستینیێن غه‌زه ل ده‌رڤه‌ى كه‌رتێ غه‌زه ژ به‌ر ئه‌گه‌رێن مرۆڤایه‌تى دكه‌ت.
وێ وه‌زیرێ گۆتیه ژى "ده‌ركه‌فتنا فله‌ستینیان ژ غه‌زه د به‌رژه‌وه‌ندیا هه‌ردو لایان دایه، خه‌لكێ غه‌زه یێن ژیانه‌كا باشتر دڤێن هه‌روه‌سا بۆ ئیسرائیلێ پشتى ڤێ كاره‌ساتا رویداى، ل شوينا ڤرێكرنا پاره‌یان بۆ دوباره ئاڤاكرنا غه‌زه، جڤاكێ نێڤده‌وله‌تى دشێت ژ بۆ پاره‌داركرنا پرۆسێسا دوباره ئاكنجیكرنا خه‌لكێ غه‌زه و هاریكاریا وان ژ بۆ ئاڤاكرنا ژیانا خۆ یا نوى ل وه‌لاتێن وان یێن نوى یێن مێهڤانداریا وان دكه‌ن، هاریكار بیت".
زێده ژى كر "مه گه‌له‌ك رێك تاقیكرن وه‌كى ده‌ركه‌فتنێ ژ غه‌زه و برێڤه‌برنا شه‌ڕه‌نیخێ هه‌روه‌سا ئاڤاكرنا دیوارێن بلند، لێ ئه‌ڤ رێكه نه‌شیان ئیسرائیلێ ژ حه‌ماسێ بپارێزن".
وه‌لاتێن عه‌ره‌بى و ب تایبه‌ت یێن جیران بۆ فله‌ستینێ، به‌رى نوكه بیرۆكه‌یا كۆچبه‌ركرنا خه‌لكێ غه‌زه بۆ ده‌رڤه‌ى كه‌رتێ غه‌زه ره‌تكربوون و ئه‌ڤ چه‌نده ب نه‌هێلانا كێشه‌یا فله‌ستینێ بناڤكربوون.
هه‌ر ژ 7ى ئوكتۆبه‌را بۆرى، شه‌ڕێ حه‌ماس و ئیسرائیلێ به‌رده‌وامه و تێدا پتر ژ 12 هزار فله‌ستینیان هه‌روه‌سا 1200 ئیسرائیلیان گیانێ خۆ ژده‌ستداینه و ب هزاران كه‌س بریندار بووینه زێده‌بارى زیانێن ئابوورى یێن مه‌زن یێن شه‌رى بۆ هه‌ردو لایان.
