گاڤ

سەرۆکوەزیرێ بەرێ یێ بریتانیا پەیاما بەردەوامیا پشتەڤانیا بریتانیا بۆ هەرێما کوردستانێ گەهاندنە هەرێمێ و دیارکر کو ئەو شەڕێ پێشمەرگەى دژى داعش کرى شەڕەک بوو ژ بۆ پاراستنا مە هەمیان هەروەسا ئاماژە دا گرنگیا ئێکگرتنا لایەنێن کوردستانى.

بۆریس جۆنسۆن سەرۆکوەزیرێ بەرێ یێ بریتانیا د کۆربەندێ مێپس دا گۆت "نوکە هەرێما کوردستانێ ژ هەمی دەمان پتر پێدڤی ب ئێکگرتنێ یە و کەیفا من دهێت دەمێ پارتی و ئێکەتیێ ب ئێکگرتی دبینم".

دیار ژى کر؛ هەرێما کوردستانێ دەڤەرەکا ئارامە و ژ هەمی دەڤەرێن دی یێن رۆژهەلاتا ناڤین جودایە و پێدڤیە بهێتە پاراستن.

بۆریس جۆنسۆن گۆت ژى "من دڤێت سوپاسیا هەوە هەمیان بکەم، هەست دکەم ل مالا خۆ مە، من ل گەل سەرۆکێ بەرێ یێ کوردستانێ ئاخفت و من گۆت چەند سالان بەرى نوکە پێشمەرگە د هێلا پێشیێ یا شەڕێ دژى داعش دا بوون، وەک سەرۆکێ باژێرڤانیا لەندەن ئەز هاتمە ڤێرێ دا بزانم بریتانیا چەوا دێ شێت هاریکاریا پێشمەرگەى و کوردان بکەت".

جۆنسۆن دیار ژى کر؛ ئەم ل بریتانیا ژى رویبروى هەمان گەفا داعش ببووین، وان کەسێن سڤیل دکوشتن، شەرێ هەوە دکر، شەڕێ مە ژى بوو، ئەو شەڕێ پێشمەرگەى دژى داعش کرى شەڕەک بوو ژ بۆ پاراستنا مە.

خۆیا ژى کر؛ ئەز هەردەم هەڤسۆزێ خەباتا هەوە بووم ژ بۆ سەرکەفتنێ ل سەر دژمنێ هەوە داعش، سوپاس بۆ قارەمانیا گەلێ کورد و سوپاس بۆ قارەمانیا پێشمەرگەیێ کوردستانێ.

گۆت ژى "دەمێ من سەرەدانا کوردستانێ کرى ل دەمێ شەڕێ دژى داعش ئەز د گرنگیا کوردستانێ گەهشتم، پەیاما من بۆ هەوە ئەڤرۆ ئەوە بریتانیا دێ ب تەمامى بەردەوام بیت د پشتەڤانیکرنێ دا ژ هەوە".

جۆنسۆن ل دۆر پرۆژەیێ هژمارا من یێ حکومەتا هەرێمێ بۆ رۆژنامەڤانان گۆت "وەکى من د گۆتارا خۆ دا گۆتى، ئەز پیرۆزباهیێ ل کارێ حکومەتێ بۆ دیجیتالکرنا بەنکى و تەکنولۆژیایا کەسک و بەرهنگاریا گوهۆڕینێن سەقاى دکەم".