گاڤ

مەزنە شیرەتکارێ وزەیێ ل کۆچکا سپى دیارکر کو ئەمریکا د وێ هزرێ دا نینە عەرەب پەترۆلێ وەک چەکەکێ ئابوورى ل دژى ئیسرائیلێ بکاربینن هەڤدەم ل گەل بەردەوامیا شەڕێ حەماس و ئیسرائیلێ.

ئامۆس هۆشستاین بۆ فاینانشیال تایمز دیارکر "ئەمریکا د وێ باوەریێ دایە وەلاتێن بەرهەمهینەر بۆ پەترۆلێ، پەترۆلێ وەک چەکەکێ ئابوورى بکارنائینن".

ئاماژە ب وێ چەندێ ژى کر "بەرى نوکە جار بۆ جار پەترۆل وەک چەک دهاتە بکارئینان، ئەم هەردەم د نیگەرانیێ دا بووین ژ ڤێ چەندێ و ئەم کار دکەین ئەو چەندە روینەدەت".

گۆت ژى "دو شەڕ د نوکە دا ل جیهانێ هەنە، ئێک گرێداى رۆسیایە سێیەم مەزنترین بەرهەمهینەرا پەترۆلێ ل جیهانێ، یێ دى ژى ل رۆژهەلاتا ناڤینە کو مووشەک دکەڤنە جهێن نزیک ژ جهێن بەرهەمئینانا پەترۆلێ، ل گەل ڤێ چەندێ بهایێن پەترۆلێ نزیکى کێمترین ئاست دبن د سالەکێ دا".

خۆیا ژى دکەت "هەڤکارى و هەماهەنگى دناڤبەرا بەرهەمهینەران و بکاربەران د هەردو سالێن بۆرى دا یا ب هێز بوو وەک بزاڤەک بۆ رێگریێ ل قەیرانێن وزەیێ".

زێدە ژى کر: ئاستێ هەڤکاریێ دناڤبەرا ئەمریکا و وەلاتێن کەنداڤى ژ وان ژى سعوودیە د بوارێ وزەیێ دا د دو سالێن بۆرى دا یێ باش بوو.