گاڤ

سزایێن دارایى یێن مەزن ل سەر ژمارەیەکا کۆمپانیێن تەکنولوژیایێ ژ بەر هەڤڕکیا نەدروست یان خراب بکارئینانا داتایان هاتینە سەپاندن لێ پرانیا جاران کۆمپانى دانا وان سزایان گیرۆ دکەن و تانەیان ل بڕیاران ددەن.

دەستەیا رێکخستنا داتایان یا ئێرلەندى وەکى د راپۆرتەکا فرانس پرێس دا هاتى دیارکریە؛ سزایێن دارایى یێن 2.2 ملیار دۆلاران هەر ژ سێپتەمبەرا بۆرى ل سەر کۆمپانیا مێتا هاتینە سەپاندن لێ وێ نەداینە.

ژ لایێ خۆڤە، کۆمپانیا ئەمازۆن تێهەلچوونەک ل سەر بڕیارا سزادانێ ب 746 ملیۆن دۆلاران یا سالا 2021 پێشکیشکریە وەکى دەستەیا رێکخستنا داتایان ل لۆکسۆمبۆرگێ بۆ فرانس پرێس دیارکرى.

هەروەسا گووگل نەرازیبوون ل سەر سزایێن دارایى یێن ئێکەتیا ئەورۆپى کو دگەهنە پتر ژ 8 ملیار دۆلاران ژ بەر خراب بکارئینانا پێگەهێ خۆ د بازارى دا دناڤبەرا سالێن 2017 و 2019 دا پێشکێشکریە.

کۆمپانیا ئەپل ژى بۆ چەندین سالایە رێکارێن یاسایى ل دژى بڕیارەکا دادگەهەکا فرەنسى ب سزادانێ ب 1.1 ملیار دۆلاران هەروەسا فەرمانا دانا خویکان ب بهایێ 13 ملیار یۆرۆیان بۆ ئێرلەندا گرتینە بەر.

ئوسترالیا ژى ل ڤێ حەفتیێ دیارکربوو کو کۆمپانیا ئێکس سزایێن دارایى یێن خۆ نەداینە و سکالایەکا هەڤدژ تۆمارکریە.

ل گۆرەى تایبەتمەندەکێ فرەنسى؛ تشتەکێ نۆرمالە کۆمپانیێن تەکنولوژى تانەیان ل بڕیارێن سزادانێ بدەن، لێ ئەڤ چەندە وێ رامانێ نادەت کو وان سزا ل پشتگوهـ هاڤێتینە یان هەڤڕکیا وان کرینە.