وەزیرێ ناڤخۆ: پێدڤیە ل سەر ئاستێ نێڤدەولەتى گرنگیەکا پتر ب کێشەیا کوردى بهێتە دان
بەلاڤ بکە
گاڤ
وەزیرێ ناڤخۆ یێ هەرێما کوردستانێ داخواز كر گرنگیەکا پتر ب کێشەیا کوردى ل سەر ئاستێ نێڤدەولەتى بهێتە دان.
رێبەر ئەحمەد د پەیڤەکێ د چارچووڤەیێ کۆربەندێ مێپس دا ئەڤرۆ دوشەمبیێ گۆت "کورد وەک نەتەوەیەکێ مەزن ل رۆژهەلاتا ناڤین، مافێن وان پێ نەهاتینە دان، پێدڤیە ل سەر ئاستێ نێڤدەولەتى گرنگیەکا پتر ب کێشەیا کوردى بهێتە دان".
ئاماژە ب وێ چەندێ ژى کر "هەرێما کوردستانێ باوەرى ب ئازادیێ و ئاشتیێ و پێکڤەژیانێ هەیە، پێکڤەژیان و ئێکودوقەبویلکرن فەرهەنگا گەلێ کوردستانێ یە".
خۆیا ژى کر " ل هەرێما کوردستانێ د نوکە دا پتر ژ ملیۆن پەنابەر و ئاوارەيان هەنە، دیاردەیا کۆچکرنێ ل رۆژهەلاتا ناڤین ل وان وەلاتێن ئالۆزى لی هەین زێدەبوویە، پێدڤیە دیالۆگەکا نێڤدەولەتى بۆ نەهێلانا ڤێ دیاردەیێ دەستپێبکەت".
گۆت ژى: دەڤەرا رۆژهەلاتا ناڤین د ژمارەیەکا ململانێیان دا دبۆریت و جڤاکێ نێڤدەولەتى وەک پێدڤى د ئاستێ چارەکرنا پرسان دا نەبوو.
زێدە ژى کر "پێدڤیە قەیرانێن ل رۆژهەلاتا ناڤین بهێنە چارەسەرکرن و نەک برێڤەبرن".
