سەرۆکوەزیرێ بەرێ یێ بریتانیا دوپاتى ل سەر پێدڤیاتیا هەبوونا گەشتێن فڕۆکەڤانى یێن ئێکسەر دناڤبەرا هەولێر و لەندەن دا کر
بەلاڤ بکە
گاڤ
سەرۆکێ حکومەتا هەرێما کوردستانێ و سەرۆکوەزیرێ بەرێ یێ بریتانیا پێشڤەبرنا پەیوەندیێن دوقولى دناڤبەرا هەرێما کوردستانێ و بریتانیا دا بەحسکرن.
مەسروور بارزانى سەرۆکێ حکومەتا هەرێمێ ئەڤرۆ دوشەمبیێ ل گەل بۆریس جۆنسۆن سەرۆکوەزیرێ بەرێ یێ بریتانیا کۆمبوو.
ل گۆرەى راگەهاندنەکا سەرۆکێ حکومەتێ؛ هەردو لایان بیر و بۆچوون ل دۆر دویماهیک پێشهات و گوهۆڕینێن رەوشا گشتى یا ئیراقێ و دەڤەرێ و پێشڤەبرنا پەیوەندیێن هەرێما کوردستانێ و بریتانیا ئالوگۆرکرن.
هەر ل گۆرەى بەیانێ "سەرۆکوەزیرێ بەرێ یێ بریتانیا ئاماژە ب وێ چەندى کر کو هەرێما کوردستانێ قۆربانیێن مەزن داینە ژ بۆ مافێن خۆ و پێدڤیە جڤاکێ نێڤدەولەتى پشتەڤانیێ ل مافێن خەلکێ کوردستانێ بکەت، گۆت ژى هەردەم هەرێما کوردستانێ جهەکێ تایبەت ل دەف من هەیە و دێ بەردەوام بین د پشتەڤانیکرنێ دا ل هەرێمێ".
سەرۆکوەزیرێ بەرێ یێ بریتانیا هەروەسا دوپاتى ل سەر پێدڤیاتیا هەبوونا گەشتێن فڕۆکەڤانى یێن ئێکسەر دناڤبەرا هەولێر و لەندەن دا کر.
سەرۆکێ حکومەتێ سوپاسیا بریتانیا ژ بەر پشتەڤانیا وێ یا بەردەوام بۆ هەرێما کوردستانێ کر، هەروەسا ئاماژە دا گوهۆڕینێن ئیراقێ و دەڤەرێ و دوپاتى ل سەر پاراستنا مافێن گەلێ کوردستانێ و رێزگرتنێ ل قەوارەیێ دەستوورى یێ هەرێما کوردستانێ کر ژ بۆ سەقامگیربوونا ئاشتى و ئاسایشێ ل ئیراقێ و دەڤەرێ.
