گاڤ

د بیست و چار دەمژمێرێن بۆری دا زێدەترین رێژەیا بارانبارینێ ل پارێزگەها دهۆکێ ل سنۆرێ دەڤەرداریا ئاکرێ بوو و کێمترین رێژە ل سنۆرێ شێخان بوو.

سەقاناسیا دهۆکێ راگەهاند: دوهی رۆژا دوشەمبی 20-11-2023یێ ل بجیل ل سنۆرێ ئاکرێ پترین رێژەیا بارانێ باری یە کو 60 ملیمەتر بوون و ل سنۆرێ ئامێدیێ ژی ل ناوچەداریا سەرسنکێ پترین رێژەیا بارانێ باری یە کو 50 ملیمەتر بوون و ل ناوچەداریا شێلادزێ 46 ملیم، ل ناوچەداریا کانی ماسێ 45.5 ملیمەترێن بارانێ ل گەل 3 سەنتیمەترێن بەفرێ، ل ناوچەداریا بامەڕنێ 45 ملیمەتر و ل ناوچەداریێن چەمانکێ و دینارتێ و سەنتەرێ ئامێدیێ 41 ملیمەترێن بارانێ بارینە.

دوهی هەموو دەڤەرێن سنۆرێ پارێزگەها دهۆکێ باران باری یە، لێ ل هندەک دەڤەرێن وەکی سەنتەرێ زاخۆ و شێخان و بەردەرەش رێژە کێمتر بوو، ل زاخۆ 12.7 ملیم، ل بەردەرەش 12.5 ملیم و ل شێخان ژی بتنێ 10 ملیمەترێن بارانێ بارینە.