گاڤ

پەیڤدارێ سەرۆکاتیا هەرێما کوردستانێ بۆ گاڤ بەحس ل رۆلێ سەرۆک نێچیرڤان بارزانی د لێکنێزیککرنا ئالیێن سیاسی و پەیوەندیێن هەولێر و بەغدا و هەلبژارتنان دکەت.

دلشاد شەهاب بۆ گاڤ گۆت: هەردەما ئالیێن سیاسی یێن کوردستانێ نێزیکی هەڤدو ببن، کوردستانێ دەستەکەفتێن مەزن بدەستخۆڤە ئیناینە، بەروڤاژی ژی ئەگەر ئالی ژێک دویرببن، مەترسی ل سەر پێگەهێ هەرێما کوردستانێ پەیدا بوویە. ئەو کێشەیێن د ناڤبەرا پارتی و ئێکەتی دا چێبووین زیانێن مەزن گەهاندینە پێگەهێ هەرێما کوردستانێ و ئێک ژ ئەگەرێن کێشەیێن نوکە ژی ل گەل حکومەتا فیدرالی نەئێکدەنگیا ئالیێن سیاسی یە. ژبەر ڤێ  یەکێ سەرۆک نێچیرڤان بارزانی ل سەر بزاڤێن خۆ یێن لێکنێزیکرنا ئالیێن سیاسی یێ بەردەوامە و باوەری ب رێبازا لێکنێزیککرن و رێکخستنا ناڤمالا کوردی هەیە.

هەروەسا گۆت ژی، پارتی و ئێکەتی بەردەوام د پەیوەندیان دانە و رێخۆشکەر ژی د بەردەوامن بۆ گەهشتنا چارەیەکا هەردەمی بۆ هەمی کێشەیێن نوکە هەیی.

دەربارەی بریارا ئابۆرێ سەربخۆ ژی گۆت: ئەو بریارەکا گاڤەکا باش و سەرکەفتیبوو بۆ هەرێما کوردستانێ، ل وی دەمی کو پەیوەندیێن هەولێرێ ل گەل بەغدا د باش نەبوون و هەمی مافێن دارایی یێن هەرێمێ هاتبوونە بڕین، هەرێم پێدڤی ب ژێرخانەیا خۆ یا ئابۆری بوو و ئەگەر ئەو بریارە نەهاتبوو دان، مەترسیا نەمانا پێگەهێ هەرێمێ هەبوو، لێ گاڤێ هەرێم کرە یاریکەرەکێ زندی د معادلاتێن ئابۆری یێن جیهانی و هەرێمی دا.

دەربارەی هنارتنا پەترۆلا هەرێما کوردستانێ ژی دلشاد شەهاب دا زانین کو هیڤیێن باش هەنە د دەمەکێ نێزیک دا پەترۆل دوبارە بهێتە هنارتن و لێکتێگەهشتنەکا باش ژی ل سەر وی بابەتی د ناڤبەرا هەولێر و بەغدایێ دا هەیە.

دەربارەی هەلبژارتنان ژی دیارکر کو هەمی گاڤێن تا نوکە هاتینە هنارتن بۆ وێ یەکێ نە هەلبژارتن د دەمێ خۆ دا بهێنە کرن و ئەو ژڤانێ هاتیە دانان ب رێککەفتنا ئالیێن سیاسی هاتیە دانان، هەمی بەرهەڤی هاتینە کرن چ مەترسیێن پاشخستنێ ژی نینن.