توركیا مهرجێ رازیبوونێ ل سهر ئهندامبوونا سویدێ د ناتۆیێ دا ئاشكرا دكهت
گاڤ
سهرۆكێ توركیا رازیبوونا وهلاتێ خۆ ل سهر ئهندامبوونا سویدێ د ههڤپهیمانیا ناتۆیى دا ب رازیبوونا كۆنگرێسێ ئهمریكى ل سهر فرۆشتنا فڕۆكهیێن F16 بۆ توركیا گرێدا.
ل گۆرهى ژێدهرێن نووچهیان، حكومهتا ئهمریكا نه رێگره د فڕۆشتنا فڕۆكهیێن F16 دا بۆ توركیا لێ كۆنگرێسێ ئهمریكى ژ بهر ئهگهرێن سیاسى و ب تایبهت ئالۆزبوونا پهیوهندیێن توركیا ل گهل یوونانێ بهربهست د رێكا وێ ههڤبهستێ دا دروستكرینه.
رهجهب تهیب ئهردۆگان گۆت "ل دهمێ بهحسێ كڕینا كامیرهیان بۆ فڕۆكهیێن خۆ یێن بێفڕۆكهڤان دكهین، كهنهدا بهحسێ چ تشتان ناكهت ب تنێ بهحسێ سویدێ نهبیت، ئهمریكا ژى ههمان تشت دكهت، هوین دبێژن كو هوین دێ رێكاران د بابهتێ فرۆشتنا فڕۆكهیێن F16 بۆ توركیا دا پشتى رازیبوونا كۆنگرێسى ل سهر گرنهبهر، هوین وى تشتێ ل سهر ههوه پێدڤی بكهن و پهرلهمانێ مه ژى دێ بڕیارا پێدڤى ل دۆر سویدێ دهت".
ل گۆرهى پهیرهوێ ناتۆیێ، ئهندامبوونا ههر وهلاتهكێ نوى د ههڤپهیمانیێ دا پێدڤى ب رازیبوونا ههر 31 وهلاتێن ئهندام ههیه، بۆ ئهندامبوونا سویدێ ژى تا نوكه ب تنێ توركیا و هنگاریا ماینه رازیبوون ل سهر نهداین، ل دهمهكێ وان ههردو وهلاتان رازیبوون بۆ فینلاند داینه.
بۆ دهمێ 17 ههیڤان بوو، سهرۆكێ توركیا پرۆتوكۆلێ ئهندامبوونا سویدێ د ناتۆیێ دا راگرتبوو و ئهو وهلاته ب پشتهڤانیكرنێ ل هندهك بهرهنگارێن دهستههلاتا توركیا تۆمهتباركربوو بهرى ل دویماهیا ههیڤا ئوكتۆبهرێ وى بابهتى رهوانهى پهرلهمانى بكهت.
پهرلهمانێ توركیا ل ناڤهراستا ههیڤا چریا دوێ یا بۆرى دهست ب خواندنا پرۆتوكۆلێ ئهندامبوونا سویدێ د ناتۆیێ دا كربوو كو ههر ژ ههیڤا گۆلانا سالا 2022 هاتبوو راگرتن، لێ پاشى گهنگهشه هاتنه پاشئێخستن و لژنهیا كاروبارێن دهرڤه د پهرلهمانێ توركیا دا تا نوكه ژڤانێ دوباره دهستپێكرنا گهنگهشهیێن پرۆتوكۆلێ ئهندامبوونا سویدێ د ناتۆیێ دا دهستنیشان نهكریه.
سویدێ ل دویماهیا ههیڤا چریا دوێ یا بۆرى راگههاند بوو كو توركیا ئهو پشتراستكریه كو دێ د دهمێ چهند حهفتیان دا ل سهر ئهندامبوونا وێ د ناتۆیێ دا رازى بیت.