گاڤ

ئێكه‌تیا ته‌پاپێى یا ئیراقێ ئه‌ڤرۆ ئه‌ینیێ راگه‌هاند كو ئێكه‌تیا ته‌پاپێى یا نێڤده‌وله‌تى ’فیفا’ رازیبوو مونته‌زه‌ر ماجد یاریێ بۆ هه‌لبژارتیێ ئیراقێ بكه‌ت.

مونته‌زه‌ر ماجد یاریكه‌ره‌كێ پیشه‌كار یێ ئیراقى یه‌ و یاریێ بۆ یانه‌یا هاماربى یا سویدى دكه‌ت، فیفا ل سه‌ر ڤه‌گوهاستنا فایلا وى ژ ئێكه‌تیا ته‌پاپێى یا سویدێ بۆ ئێكه‌تیا ته‌پاپێى یا ئیراقێ رازیبوو.

ئێكه‌تیا ته‌پاپێى یا ئیراقێ راگه‌هاند "مونته‌زه‌ر ماجد د نوكه‌ دا ل به‌رده‌سته‌ و دشێت هه‌ر ژ نوكه‌ یاریێ بۆ هه‌لبژارتیێ ئیراقێ بكه‌ت".

خێسۆس كاساس راهێنه‌رێ هه‌لبژارتیێ ئیراقێ بۆ كاسا ئاسیا یا 2024 و ڤاڤارتنێن موندیالا 2026 پشتبه‌ستنه‌كا مه‌زن ل سه‌ر یاریكه‌رێن ئیراقى یێن پیشه‌كار د خۆلێن ئه‌ورۆپى دا دكه‌ت.

ئیراق د كاسا ئاسیا 2024 دا دێ د كۆما خۆ دا یاریێ ل گه‌ل ژاپۆن، ئیندۆنیسیا و ڤێتنامێ كه‌ت.

ئیراقێ د هه‌ردو یاریێن ده‌ستپێكێ یێن ڤاڤارتنێن موندیالا 2026 دا سه‌ركه‌فتن ل سه‌ر ئیندۆنیسیا ل به‌سره‌ و ل سه‌ر ڤێتنامێ ژ ده‌رڤه‌ى یاریگه‌ها خۆ ب ئه‌نجامێن 5-1 و 0-1 تۆماركربوو.