گاڤ

بكاربرنا غازێ ژ لایێ وه‌لاتێن ئه‌ورۆپى ڤه‌ ل سالا 2023 گه‌هشتیه‌ كێمترین ئاستێ ده‌هـ سالێن بۆرى.

ل گۆره‌ى ئینستیتیۆتا ئابوورێ وزه‌یێ و شڕۆڤه‌كرنا دارایى ئه‌ڤرۆ چارشه‌مبیێ؛ بكاربرنا غازێ ل ئه‌ورۆپا ل وه‌لاتێن ئێكه‌تیا ئه‌ورۆپى و نه‌رویج و توركیا د سالا 2023 دا گه‌هشتیه‌ كێمترین ئاستێ ده‌هـ سالێن بۆرى.

هه‌ر ل گۆره‌ى وێ سازیێ، بكاربرنا غازێ ژ لایێ وه‌لاتێن ئه‌ورۆپى ڤه‌ د سالا بۆرى دا گه‌هشتبوو 452 ملیار مترێن سێجا.

هه‌ر ژ ده‌مێ ده‌ستپێكرنا ئوپه‌راسیۆنا له‌شكه‌رى یا رۆسیا ل سه‌ر ئۆكراینا، داخوازیا ئه‌ورۆپى ل سه‌ر غازێ ب رێژه‌یا 20% كێمبوویه‌، وه‌لاتێن ئه‌ورۆپى بزاڤكرینه‌ قه‌ره‌بۆیا غازا ژ هێلێن بۆریان دهێت ب رێكا غازا سرۆشتى یا شل یا ب رێكا ده‌ریایێ دهێته‌ ڤه‌گوهاستن، بكه‌ن.

د هه‌ردو سالێن 2022 و 2023 دا، وه‌لاتێن ئه‌ورۆپا ب بهایێ پتر ژ 170 ملیار یۆرۆیان غازا شل كڕینه‌.

سه‌ره‌راى سزایێن ئه‌ورۆپى ل سه‌ر موسكۆیێ، وه‌لاتێن ئه‌ورۆپى د سالێن 2022 و 2023 دا ب بهایێ 23.84 ملیار یۆرۆیان غازا رۆسى كڕینه‌، ل ده‌مه‌كێ ب بهایێ 75.15 ملیار یۆرۆیان غازا ئه‌مریكى و ب بهایێ 23.80 ملیار یۆرۆیان غازا قه‌ته‌رى كڕینه‌.