گاڤ

ژێده‌ره‌كێ سیاسى راگه‌هاند كو سه‌رۆكێ رێكخراوا به‌در هه‌ر 15 به‌ربژارێن عه‌شیره‌تا به‌نى ته‌میم بۆ پۆستێ پارێزگارێ دیاله‌ ره‌تكرن.

ئه‌و ژێده‌ره بۆ شه‌فه‌ق نیوز رادگه‌هینیت كو ئه‌ندامێن جڤاتا پارێزگه‌ها دیاله‌ ژ عه‌شیره‌تا به‌نى ته‌میم كو ژ تیما هه‌ڤڕكا پارێزگارێ نوكه‌ یێ دیاله‌ موسه‌ننا ته‌میمى نه‌، 15 به‌ربژار ژێگرتینه‌ كو هه‌مى ژ به‌نى ته‌میمن و ب رێكا نڤیساره‌كێ كو ئیمزا ل سه‌ر كرینه‌، بۆ هادى عامرى سه‌رۆكێ رێكخراوا به‌در بۆ ژێگرتنا ئێك ژ وان ل جهێ موسه‌ننا ته‌میمى وه‌ك پارێزگارێ دیاله‌ ئاراسته‌كرینه‌.

دیار ژى كریه‌ "عامرى هه‌مى به‌ربژارێن د وێ نڤیسارێ دا بۆ پۆستێ پارێزگارى هاتین ره‌تكرن"، بێى ئاماژه‌یێ بده‌ته‌ هویركاتیێن پتر.

موسه‌ننا ته‌میمى پارێزگارێ دیاله‌ ل رۆژا 3ى ڤێ هه‌یڤێ داخواز ژ جڤاتا پارێزگه‌ها دیاله‌ كربوو كو روینشتنا خۆ یا ئێكێ گرێبده‌ت و پارێزگارى و جێگرێ وى و سه‌رۆكێ جڤاتا پارێزگه‌هێ و جێگرى وى بهه‌لبژێریت، لێ هه‌ر ژ وى ده‌مى تا نوكه ژ به‌ر هه‌بوونا ناكۆكیان دناڤبه‌را فراكسیۆنێن سیاسى یێن سه‌ركه‌فتى د هه‌لبژارتنان دا،‌ جڤاتا پارێزگه‌ها دیاله‌ نه‌شیایه‌ روینشتنا خۆ یا ئێكێ گرێبده‌ت.

ل رۆژا 18ى كانوینا ئێكێ یا سالا بۆرى، هه‌لبژارتنێن جڤاتا پارێزگه‌ها دیاله‌ كو ژ 15 كورسیان پێكدهێت برێڤه‌چووبوون، د هه‌لبژارتنان دا هه‌ڤپه‌یمانیا ’دیالتنا’ یا نیشتیمانى 4 كورسى، ته‌قه‌دوم 3 كورسى، سیاده‌ 3 كورسى، ئیستیحقاق دیاله‌ 2 كورسى، هه‌ڤپه‌یمانیا عه‌زم 1 كورسى، هه‌ڤپه‌یمانیا ئه‌ساس یا ئیراقى 1 كورسى و ئێكه‌تیێ 1 كورسى بده‌ستڤه‌ئینابوون.