رۆنكرنه‌ك ژ یانه‌یا دهۆك ل دۆر رویدانێن یارییا ل گه‌ل جه‌ویه‌

بەلاڤ بکە

 

 

گاڤ

یانه‌یا دهۆك رۆنكرنه‌ك ل دۆر رویدانێن یارییا دوهى ل گه‌ل جه‌ویه‌ به‌لاڤكر و راگه‌هاند؛ سه‌رۆكێ یانه‌یا دهۆك د په‌یوه‌ندییه‌كا ته‌له‌فۆنى دا ل گه‌ل سه‌رۆكێ یانه‌یا جه‌ویه‌ دلگرانییا خۆ ژ رویدانێن یارییا دوهى ل گه‌ل جه‌ویه‌ دیاركریه‌.

یانه‌یا دهۆك د به‌یانه‌كێ دا راگه‌هاند "پشتى كارگێرییا یانه‌یا جه‌ویه‌ به‌یاننامه‌یا خۆ ل سه‌ر رویدانێن یارییا دوهى به‌لاڤكرى، ئه‌م ژ ناڤه‌رۆكا وێ حێبه‌تى ماینه‌ و مه‌ دڤێت به‌ره‌ڤانیێ ژ خۆ بكه‌ین و یانه‌یا دهۆك و پشته‌ڤانێن وێ ژ وان ئاخفتنان د دویرن".

دیار ژى كریه‌ "یانه‌یا دهۆك هه‌رده‌م پیشه‌نگ بوویه‌ بۆ سه‌رئێخستنا خۆلا ئیراقێ، رویدانێن یارییا مه‌ ل گه‌ل جه‌ویه‌ ل خۆله‌كا 92 بوون و ژ وێ چه‌ندێ ده‌ستپێكرن ده‌مێ سێ ژ كارگێرێن تیما وێ هێرش ل سه‌ر هه‌لگرێ ته‌پێ یێ 12 سالى كرین و ب توندى هاتیه‌ ئێشاندن".

یانه‌یا دهۆكێ ئاماژه‌ دایه‌ وێ چه‌ندێ ژى "د په‌یوه‌ندییه‌كا ته‌له‌فۆنى دا سه‌رۆكێن یانه‌یێن دهۆك و جه‌ویه‌ ل سه‌ر دویماهیك پێشهات راوه‌ستیاینه‌ و گۆتوبێژ كرینه‌ و سه‌رۆكێ یانه‌یا دهۆك دیاركریه‌ كو ئه‌م ژ ڤان رویدانان دلگران بووینه‌ و هه‌مى پشته‌ڤانێن دهۆكێ ژى پێ نه‌خۆش بووینه‌ و ئه‌و كه‌سێن هاتینه‌ دناڤ یاریگه‌هێ دا هاتینه‌ ده‌سته‌سه‌ركرن و دێ یانه‌یا دهۆك سكالایێ ل سه‌ر تۆمار كه‌ت".

یانه‌یا دهۆك زێده‌ ژى كریه‌ "یانه‌یا جه‌ویه‌ تا کو ژ پارێزگەها دهۆکێ دەرکەفتی چ تشت نەهاتینە رویدان و هێزێن ئەمنی کارێ خۆ ب رێکوپێکی کرییە".

یانه‌یێ داخواز كریه‌ "ئه‌م و راگه‌هاندن و پشته‌ڤان هه‌مى پێكڤه‌ هاریكار بین دا كو خۆل ب شێوه‌یه‌كێ جوان برێڤه‌بچیت".

 

زێدەتر دەربارەی