گاڤ

حکومەتا فیدرالی یا ئیراقێ ب نڤیسارەکا فەرمی بەرسڤا داخوازییا خەرجکرنا سێ مووچەیێ سالا 2023 یێن فەرمانبەرێن هەرێما کوردستانێ دا و تێدا دوپات کرییە کو ئەو پێگیری بریارا دادگەها فیدرالی نە.

د نڤیسارا فەرمی یا نڤیسینگەها سەرۆکوەزیرێ ئیراقێ دا کو بۆ ئەمیندارییا گشتییا جڤاتا نوینەرێن ئیراقێ هنارتییە، هاتییە"حکومەتا فیدرالی کار ب قانوونا بودجەیا گشتی یا فیدرالی بۆ سالێن 2023،2024 و 2025 دکەت و پێگری بریارا دادگەها فیدرالی یە".

د ڤێ نڤیسارێ دا وەسا دیاردبیت کو حکومەتا فیدرالی خەرجکرنا وان سێ مووچەیان ب ستۆیێ خۆ ڤە ناگریت و ناهنێریت.

ل رۆژا 25/2/2024ێ 26 ئەندامێن پەرلەمانێ ئیراقێ د نڤیسارەکا فەرمی دا بۆ جڤاتا وەزیرێن ئیراقێ داخوازا خەرجکرنا وان سێ مووچەیێ سالا بۆری کربوو و ئەڤرۆ جڤاتا وەزیران بەرسڤا وان دایە.