گاڤ

ده‌سته‌یا ئاماران یا توركى راگه‌هاند؛ ئیراقییان د هه‌یڤا ئادارێ یا بۆرى دا 82 خانى ل توركیا كڕینه‌ و ب ڤێ چه‌ندێ ئیراق ل رێزا چارێ د رێزبه‌ندییا وه‌لاتان دا ل گۆره‌ى كڕینا وه‌لاتیێن وان بۆ خانییان ل توركیا هات.

ل گۆره‌ى راپۆرته‌كا ده‌سته‌یێ ئه‌ڤرۆ شه‌مبیێ "كڕینا بیانییان بۆ خانییان ل توركیا د هه‌یڤا ئادارێ یا بۆرى دا ب رێژه‌یا 47.9% ب هه‌ڤبه‌ركرن ل گه‌ل ئادارا سالا 2023 كێمبوویه‌".

دیار ژى كریه‌ "د ئادارا بۆرى دا، 1778 خانى بۆ بیانییان ل توركیا هاتیه‌ فرۆشتن، ئانكۆ رێژه‌یا 1.7% ژ سه‌رجه‌مێ خانیێن ل توركیا ل ئادارێ هاتینه‌ فرۆشتن بۆ بیانییان بوون".

ئاماژه‌ ب وێ چه‌ندێ ژى كریه‌ "ل سته‌نبۆلێ پترین رێژه‌یا خانییان ژ لایێ بیانییان ڤه‌ هاتینه‌ كڕین كو 652 خانى بوون، ل دویڤ دا ئه‌نتالیا كو 618 خانى بوون و ل دویڤ دا مێرسین كو 151 خانى بوون".

ئاشكرا ژى كریه‌ "وه‌لاتیێن رۆسى ژ خه‌لكێ هه‌مى وه‌لاتان پتر خانى ل توركیا د هه‌یڤا ئادارێ دا كڕینه‌ كو 411 خانى بوون، ئیرانى ل رێزا دوێ ب 182 خانییان، ئوكراینى ل رێزا سیێ ب 129 خانییان و ئیراقى ل رێزا چارێ ب 82 خانییان هاتن".