"کێشەیا فەرمانبەرێن گرێبەستێن ساخلەمییێ چارەبوو"
بەلاڤ بکە
گاڤ – تایبەت
گرێبەستێن فەرمانبەرێن ل سەر بودجەیا پەرەپێدانێ ل پارێزگەها دهۆکێ و ئیدارەیا سەربەخۆ یا زاخۆ دهێنە نویکرن و دێ مووچەیێن وان هێنە دان.
پتری سێسەد و بیست فەرمانبەران ل سەر بودجەیێن پەرەپێدانێ یێن ساخلەمییا دهۆکێ و زاخۆ هەنە و سالانە تا گرێبەستێن وان نەهێنە نویکرن، مووچەیان وەرناگرن.
د. ئەفراسیاب مووسا، رێڤەبەرێ گشتی یێ ساخلەمییا پارێزگەها دهۆکێ بۆ گاڤ گۆت: نڤیسارا نویکرنا گرێبەستێن فەرمانبەرێن ل سەر بودجەیا پەرەپێدانێ گەهشتییە وان و وان داخواز ژ فەرمانبەران کرییە "بچن گرێبەستێن خۆ ئیمزابکەن".
ئێک ژ نوینەرێن فەرمانبەرێن گرێبەست ل زاخۆ بۆ گاڤ گۆت: کێشەیا وان ب تەمامی چارەبوو و هەر چل و پێنج فەرمانبەرێن زاخۆ گرێبەستێن خۆ ئیمزاکرن، بەری جەژنا رەمەزانێ وان مووچەیەک وەرگرتبوو و ئەڤرۆ هەرسێ مووچەیێن دی ژی وەرگرتن.
نوینەرێن فەرمانبەرێن گرێبەست یێن دهۆکێ ژی ب رێکا گاڤ داخواز ژ سەرۆکاتییا ساخلەمییا دهۆکێ کرییە: هەرچار مووچەیێن وان پێکڤە بدەن و د. ئەفراسیاب مووسا، رێڤەبەرێ گشتی یێ ساخلەمییا پارێزگەها دهۆکێ د بەرسڤا داخوازییا وان دا دبێژیت "ل گەل نویکرنا گرێبەستان، ئەو دێ داخواز ژ گەنجینەیا دهۆکێ کەن هەرچار مووچەیان پێکڤە بۆ وان فەرمانبەرێن گرێبەست دابین بکەت، ئەگەر بودجەیا پێدڤی ل بەردەست هەبوو، دێ هەرچار مووچەیان پێکڤە دەنە وان".
دەما سێ سالانە گاڤ دویڤچوونا بابەتێ فەرمانبەرێن ساخلەمییێ یێن گرێبەست ل سەر بودجەیا پەرەپێدانێ دکەت و ئێک ژ داخوازییێن سەرەکی یێن ڤان فەرمانبەران ئەوە بهێنە دامەزراندن داکو کێشەیا وان یا سالانە کو زوی نوینەکرنا گرێبەستێن وانە، چارە ببیت.
