گاڤ

ئێكه‌تییا مامۆستایان د سالڤه‌گه‌ڕا دامه‌زراندنا خۆ دا داخواز دكه‌ت مووچه‌ گیرۆ نه‌بن، پله‌بلندكرن ده‌ستپێبكه‌ته‌ڤه‌ و مامۆستایێن وانه‌بێژ بهێنه‌ دامه‌زراندن.

ئه‌ڤرۆ 15/5/2024 سالڤه‌گه‌ڕا 62 یا دامه‌زراندنا ئێكه‌تییا مامۆستایێن كوردستانێ یه‌ و ب ڤێ هه‌لكه‌فتێ ئێكه‌تییا مامۆستایان راگه‌هاندنه‌ك به‌لاڤكریه‌.

د راگه‌هاندنێ دا، ئێكه‌تییا مامۆستایان داخواز ژ لایه‌نێن شوله‌ژێ كریه‌ داخوازیێن مامۆستایان بجهبینن، ژ وان داخوازییان ژى: لایه‌نێن سیاسى ب هه‌سته‌كێ نیشتیمانى و نه‌ته‌وه‌یى كار بكه‌ن و كێشه‌ و ململانێ بهێنه‌ ب دویماهیك ئینان، حكومه‌تا هه‌رێمێ شیانێن ماددى یێن مه‌زن بۆ په‌روه‌رده‌یێ و خواندنا بلند ته‌رخانبكه‌ت، مامۆستا ئێدى نه‌بنه‌ قۆربانیێن كێشه‌یێن حكومه‌تا فیدرالى و یا هه‌رێمێ و گیرۆبوونا مووچه‌یان بهێته‌ ب دویماهیك ئینان و هه‌ر كه‌سه‌كى ژماره‌یه‌كا به‌نكى بۆ بهێته‌ ڤه‌كرن.

ئێكه‌تییا مامۆستایان داخواز ژى كریه‌: كار ل سه‌ر وێ چه‌ندێ بهێته‌ كرن مووچه‌یێن پاشكه‌فت و لێبرینێن مووچه‌یان هه‌روه‌سا ئه‌و مووچه‌یێن نه‌هاتینه‌ دان د وێ ژماره‌یێ دا بهێنه‌ دانان هه‌روه‌سا پله‌بلندكرن بڤه‌گه‌ڕیت و یاسایا خانه‌نشینییێ یا ئێكگرتى ژماره‌ 9 یا سالا 2024 بهێته‌ بجهئینان هه‌روه‌سا مامۆستایێن وانه‌بێژ بهێنه‌ دامه‌زراندن.