گاڤ

سه‌رۆكێ پارتا گه‌ل یا كۆمارى ل دۆر دادگه‌هكرنا هه‌ڤسه‌رۆكێ پێشتر یێ پارتا دیمۆكراتییا گه‌لان، سه‌لاحه‌دین ده‌میرتاش و هه‌ڤالێن وى راگه‌هاند، دۆسیه‌یا كۆبانى سیاسییه‌ و بڕیارێن دادگه‌هێ ژى سیاسینه‌.

پشتى ده‌هان روینشتنان لسه‌ر دۆسیه‌یا كۆبانێ،پێنجشه‌مبا بۆرى دادگه‌ها سزایێن گران یا ئه‌نقه‌ره‌، سزایێ 407 سالێن زیندانكرنێ بسه‌ر 27 تۆمه‌تبارێن دۆسیێ دا سه‌پاند كو سزایێ ده‌میرتاشى ژ یێ هه‌مییان پتر و 42 سال بوون.

ئۆزگور ئۆزەل، سه‌رۆكێ پارتییا گه‌ل یا كۆمارى (جه‌هه‌پێ) د كۆمبوونا فراكسیۆنا پارتیا خۆ دا ل په‌ڕله‌مانێ تركیا راگه‌هاند، دۆسیه‌یا كۆبانێ د بنه‌ره‌ت دا یاسایی نینه‌ و هه‌مییان دیت چه‌وا دادگه‌هێ بڕیاره‌كا سیاسى دا، بۆچوونا وان هه‌ر ژ ده‌ستپێكێ وه‌سا بوو دۆسیه‌ سیاسییه‌ و د ڤى واریدا بۆچوونا وان نه‌هاتییه‌ گهۆڕین.

ئۆزه‌ل گۆت ژى، سه‌لاحه‌دین ده‌میرتاش و هه‌ڤالێن وى بێگونه‌هن ژ  وان تۆمه‌ت و سزایێن بسه‌ر دا هاتینه‌ سه‌پاندن، به‌لكو ژبه‌ر وان پۆست و بۆچوونان هاتینه‌ سزادان یێن ل سالێن بۆرى به‌لاڤكرین.