گاڤ

پۆلیسێن کەنەدا دوهی رۆژا ئەینی ملیاردێرەک ب تومەتا دەستدرێژییا سێکسی دەستەرکر و دێ ل ویلایەتا ئۆنتاریۆ هێتە دادگەهکرن.

ل گۆرەی مەدیایێن کەنەدی، دوهی رۆژا ئەینی فرانک سترۆناک، ملیاردێرێ کەنەدی – نەمساوی یێ 91 سالی ب تومەتا دەستدرێژییا سێکسی و زۆریکرنێ ل ژنان و زەپکرنا ژنان د ژووران ڤە و چەندین تومەتێن دی یێن گرێدای کارێن سێکسی و زۆریکرنێ ل ژنان، هاتییە گرتن.

ژێدەر ئاماژێ ددەن کو سترۆناکێ 91 سالی ب کەفالەت هاتییە ئازادکرن و ل دەمێن بهێن دێ ل دادگەها باژێرێ برامبتۆن ل ویلایەتا ئۆنتاریۆ هێتە دادگەهکرن.

ب دەهان سکالا ل سەر سترۆناکێ ملیاردێر هاتینە تۆمارکرن، دەما ئەو دەستدرێژییێن دهێتە گۆتن کو سترۆناکی کرینە، ژ سالێن هەشتێیان دەستپێ دکەت و دویماهی تومەت یا سالا 2023یێ یە و حکومەتا کەنەدا داخوازکرییە: هەر ژنەکا سترۆناکی دەستدرێژی کربیتە سەر، سکالایێ تۆمار بکەت.