گاڤ – تایبەت

حکومەتا ئیراقێ ب رێڤەبرنا مامەلەیێن ڤەگەڕیانا ئاوارەیان راگرت و دبێژیت: مامەلە ل دەمێن بهێن دێ ل ناڤ کەمپان هێنە بڕێڤەبرن.

حکومەتا ئیراقێ پێشتر بریار دابوو تا دویماهییا تیرمەها ئەڤ سالە، هەموو کەمپێن ئاوارەیان ل سەرتاسەری ئیراقێ بهێنە داخستن و ئاوارە بۆ دەڤەرێن وان بهێنە ڤەگەڕاندن.

هەر ئاوارەیەکێ شنگالێ یێ ڤەبگەڕیتە دەڤەرا خۆ، حکومەتا ئیراقێ کۆژمەکێ پارەی وەک قەرەبۆ ددەتێ، لێ پێدڤییە ئەو ئاوارە مامەلەیێن خۆ ل رێڤەبەرییا کۆچ و کۆچبەران یا سەر ب ئیراقێ ڤە، بڕێڤە ببەت.

ئەسکەندەر محەمەد، رێڤەبەرێ نڤیسینگەها دهۆکێ یا رێڤەبەرییا کۆچ و کۆچبەران بۆ گاڤ گۆت: وەزیرا کۆچ و کۆچبەرێن ئیراقێ شڤێدی فەرمان دایە رێڤەبەرییێن کۆچ و کۆچبەران یێن هەرێما کوردستانێ کو مامەلەیێن ئاوارەیان بڕێڤە نەبەن و بەهانە کرییە ئەو کو حکومەت دێ تیمێن تایبەت پێک ئینیت و هنێریتە کەمپان داکو مامەلە ل کەمپان بهێنە بڕێڤە برن.