گاڤ

جڤاتا وەزیرێن هەرێما کوردستانێ ئەڤرۆ ب سەرپەرشتییا مەسروور بارزانی، سەرۆکێ حکومەتێ کۆمبوو و چار بابەتێن گرنگ بەحسکرن.

د برگا ئێکێ یا کۆمبوونێ دا دەرئەنجامێن کۆمبوونێن هەڤپشک یێن هەردو حکومەتێن فیدرالی و هەرێمێ دەربارەی دەرگەهێن سنۆری کو ل رۆژا 1/7/2024 ل بەغدا کرینە، بەحسکرن.

د کۆمبوونێ دا دوپاتی ل گەشەپێدانا هاریکاری و هەماهەنگییا ئالییێن پەیوەندیدار یێن حکومەتا هەرێمێ ل گەل فیدرالی ل گۆرەی دەستووری هاتەکرن.

جڤاتا وەزیران پشتەڤانیا خۆ بۆ لژنەیا دانوستاندکار یا حکومەتا هەرێمێ دەربری و راسپاردن کو د چارچووڤێ دەستووری و یاسایێن بەرکار، درێژییێ ب دانوستاندنان ل گەل حکومەتا فیدرالی بدەن و لژنەیەکا یاسایی یا بسپۆری ژی راسپارد بۆ رێککەفتنێ ل سەر دارشتنا میکانزمەکا هەماهەنگییێ ل گەل سازییێن فیدرالی تاکو یاسایەکا تایبەت بۆ دەرگەهێن سنۆری بهێتە هەموارکرن.

د برگەیەکا دی یا کۆمبوونێ دا جڤاتا وەزیران دویڤچوون بۆ بابەتێ مووچەیێ مووچەخۆرێن هەرێمێ ب رەنگەکێ گشتی و ب تایبەتی ژی مووچەیێ هێزێن پێشمەرگەیی و ئاسایسێ کر کو وەزارەتا دارایی یا فیدرالی تانوکە مووچەیێ هەیڤێن 5 و 6 خەرجنەکرینە، زێدەباری وێ یەکێ کو لیستێن مووچەیێ هێزێن پێشمەرگەیی بۆ هویربینیێ و پێداچوونێ پێشکێشی حکومەتا فیدرالی کرینە. دەربارەی ڤێ ئاوات شێخ جەناب، وەزیرێ دارایی راپۆرتەک پێشکێشکر.

د پشکەکا دی یا کۆمبوونێ دا دویماهی پێشهاتێن بابەتێ هویربینی و پێداچوونا تیمێن هەڤپشک یێن هەردو دیوانێن چاڤدێری یێن هەرێم و بەغدا بەحسکر و دوپاتی ل بەردەوامیا ئاسانکاریێن وەزارەتان بۆ پرۆسەیا هویربینیێ هاتەکرن. هەروەسا دانوستاندن دەربارەی کارێن تیمێن هەڤپشک یێن هەردو حکومەتێن هەرێم و فیدرالی دەربارەی پرۆسەیا هەڤپشک یا یەکخستنا رێکارێن دارایی و رێکارێن وەرگرتنا باجێ دناڤبەرا هەردو حکومەتێن هەرێم و فیدرالی هاتەکرن ب بەرچاڤوەرگرتنا دەستهەلاتێن دەستووری و ب ئارستەیا پێشڤەبرن و هەمەجورکرنا ژێدەرێن دارایی.

جڤاتا وەزیران ل گەل دوپاتکرنا هەلویستێ حکومەتا هەرێما کوردستانێ کو دخوازیت چارەسەرییا دروست یا هەمی بابەتێن هەلاویستی د ناڤبەرا هەردو حکومەتێن فیدرالی و هەرێمێ بهێتەکرن، دەربارەی ڤێ سازییێن هەرێمێ پابەندییێن خۆ بجهئیناینە و ئەرکێ حکومەتا فیدرالی ژی یە کو شایستەیێن هەرێمێ خەرجبکەت مینا دەڤەرێن دی یێن ئیراقێ و ئێدی خەرجکرنا مووچەیی نەهێتە پاشخستن.

جڤاتا وەزیران داخوازێ ژ حکومەتا فیدرالی دکەت ب زویترین دەم مووچەیێ هێزێن پێشمەرگەیی و ئاسایشێ یێن هەرێمێ بۆ هەردو هەیڤێن 5 و 6 ب هنێریت.

 هەروەسا خواست شایستەیێن دی یێن هەرێمێ د تەرخانکرنێن تەشغیلی و پرۆژەیێن ئاڤەدانکرنێ و وەبەرهێنانێ خەرج بکەن کو د خشتەیێن پەسەندکری یێن بودجێ دا هاتینە تەرخانکرن کو تا نوکە چ کۆژم بۆ هەرێمێ نەهاتینە خەرجکرن و ژ دەستپێکا سالا 2024ێ، هەرێما کوردستانێ پشکا گەنجینەیا فیدرالی ژ داهاتێن نەپەترۆلی یێن هەرێمێ ب کاش بۆ وەزارەتا دارایی یا فیدرالی هنارتینە و هەیڤانە ژی لیستا مووچەیێ مووچەخۆران و تەرازوویا پێداچوونا هەیڤانە یا داهاتی و خەرجیێن هەمی وەزارەتان ب رەنگەکێ روهن و شەفاف ئارستەیی وەزارەتا دارایی یا فیدرالی کرینە.