گاڤ – تایبەت
ل پارێزگەها دهۆکێ ئامارێن نەخۆشییێن دلی و جەلتەیێن دلی زێدەبووینە و نوشدارەک ب رێکا گاڤ رێکێن خۆ پاراستنێ دیاردکەت.
د. مەجید حسێن دۆسکی، نوشدارێ تایبەتمەند ب نەخۆشییێن دلی ب رێکا گاڤ راگەهاند: ئامارێن نەخۆشییێن دلی و جەلتەیان ل پارێزگەها دهۆکێ زێدەبووینە، ل سالا 2023یێ بتنێ ل سەنتەرێ دلی ل دهۆکێ 900 نشتەرگەرییێن ڤەکرنا سینگی، هزار و 908 قەستەرە، و هزار و 510 نشتەرگەرییێن دانانا شەبەکەیا دلی، هاتینەکرن.
دەربارەی جەلتەیێن دلی، د. مەجید حسێن دبێژیت: پار 693 نەخۆش چووینە سەنتەرێ دلی کو جەلتێ لێدابوو، ئەڤە ژبلی وان کەسێن جەلتێ لێدای و نەچووینە وی سەنتەری و ئەڤ رێژەیە بۆ پارێزگەهەکا وەکی دهۆکێ گەلەکە.
د. مەجید هەروەسا دبێژیت: رێژەیا ژ سەدێ سیهـ تا سیهـ و پێنج یا کەسێن جەلتە لێددەت، گەنجن و پتریا کەسێن جەلتە لێددەت، زەلامن.
دەربارەی ئەگەران، ئەو نوشدارێ تایبەتمەند دبێژیت: زەیتا خوارنێ ژ ژەهرێ خرابترە، ڤەخوارنێن هێزێ و نەبوونا لڤینا پێدڤی بۆ هەرسکرنا خوارنێ و فشارێن دەرۆنی دبنە ئەگەر کو جەلتە چێببن.
سوبەهی رۆژا پێنجشەمبی ل دەمژمێر نەهی شەڤێ د. مەجید حسێن دۆسکی مێهڤانێ پۆدکاستا گاڤە، لەورا بۆ وەرگرتنا زانیارییێن تەمام ل سەر ئەگەرێن چێبوونا جەلتەیێن دلی و چەوانییا خۆپاراستنێ، چاڤەڕێی پۆدکاستا گاڤ ببن.