گاڤ

سه‌رۆكێ تایێ دهۆك یێ سه‌ندیكا كرێكارێن كوردستانێ بۆ گاڤ راگه‌هاند، پڕانیا زیانڤێكه‌فتیێن بازاڕێ چه‌لێ سكالا تۆماركرییه‌ لسه‌ر كه‌سێن ئاگر به‌ردایه‌ وى بازاڕى و گۆت ژى، ئه‌و ل هیڤییا ناڤێن تۆمه‌تبارانه‌ داكو روینشتنا دادگه‌هێ بهێته‌ كرن.

وه‌لات ئه‌مین ئۆزمانى، سه‌رۆكێ تایێ دهۆك یێ سه‌ندیكا كرێكارێن كوردستانێ بۆ گاڤ گۆت: ژ سه‌رجه‌مێ 260 خودانێن جهێن بازارێ چه‌لێ 99% سكالا ل دادگه‌ها دهۆكێ تۆماركرینه‌ لسه‌ر كه‌سێن ئاگر به‌ردایه‌ وى بازاڕى.

ئۆزمانى گۆت ژى، دادوه‌ر داخوازا ناڤێن تۆمه‌تباران دكه‌ت و بۆ ڤێ ئێكێ ژى ئه‌و دگه‌ل ئالیێن ئێمناهیێ لسه‌ر خه‌تن و ل ده‌مه‌كێ نێزیك دێ ناڤ ب وان هێنه‌ دان.

ل دۆر قه‌ره‌بۆكرنا زیانڤێكه‌فتیان ژى، دا زانین، دو جاران وه‌كو هاریكارى پاره‌ ب وان هاتییه‌ دان، جاره‌كێ ژلایێ فه‌رمانده‌ مه‌نسۆر بارزانى هه‌ر زیانڤێكه‌فتییه‌كى 4 هزار دۆلار پێهاتینه‌ دان، جاره‌كێ ژى حكومه‌تا هه‌رێمێ 4 ملیار دینار وه‌كو هاریكاری پێداینه‌. دا زانین ژى، پترین زیان كو پتر ژ 400 ملیۆن دینارانه‌ ب خودانێ ئاڤاهى كه‌فتییه.

گۆت ژى، ئیراقێ بودجه‌یه‌كا د هه‌وارهاتنێ بۆ بوویه‌رێن ب ڤى ره‌نگى هه‌یه‌ و ئه‌و دێ داخواز كه‌ن زیانڤێكه‌فتیێن بازارێ چه‌لێ ژى ژ ڤێ بودجه‌یێ بهێنه‌ قه‌ره‌بۆكرن.