پارتى دێ 190 به‌ربژاران پێشكێشى كۆمسیۆنێ كه‌ت

گاڤ – تایبه‌ت

كۆمسیۆنا هه‌لبژارتنان راگه‌هاند، ئه‌ڤرۆ دوماهى ژڤانێ تۆماركرنا به‌ربژارانه‌ بۆ هه‌لبژارتنێن په‌ڕله‌مانێ كوردستانێ، پارتى دێ 190 به‌ربژاران پێشكێشى كۆمسیۆنێ كه‌ت.

جومانه‌ گلایى، په‌یڤدارا كۆمسیۆنا هه‌لبژارتنێن یراقێ بۆ گاڤ راگه‌هاند، ئه‌ڤرۆ دوماهى ژڤانێ تۆماركرنا پارتێن سیاسى، هه‌ڤپه‌یمانى و به‌ربژارێن پێكهاتانه‌، تا نوكه‌ دیار نینه‌ ئه‌و ده‌م دێ هێته‌ درێژكرن یان ژى نه‌.

ل 20-10-2024ێ ب فه‌رمانا سه‌رۆكایه‌تییا هه‌رێما كوردستانێ مه‌رسوورما هه‌رێمى ده‌ركه‌فتییه‌ و بۆ رۆژا هه‌لبژارتنێن په‌ڕله‌مانێ كوردستانێ هاتییه‌ دیاركرن.

ل گۆڕه‌یى زانیاریێن گاڤ پارتى ل سه‌ر ئاستێ چار بازنه‌یان 190 به‌ربژار هه‌نه‌، پترییا وان ئێكلا بووینه‌ و ل 18ى ڤێ مه‌هێ دێ بۆ كۆمسیۆنێ هێنه‌ راده‌ستكرن.

به‌ربژارێن پارتى یێن چار بازنه‌یان

• هه‌ولیر 64 به‌ربژار
• سلێمانى 72 به‌ربژار
• دهۆك 48 به‌ربژار
• هه‌له‌بجه‌ 6 به‌ربژار

هێشتا لیستا دوماهیێ ژ ئالیێ پارتى ڤه‌ نه‌هاتییه‌ دیاركرن و ئه‌گه‌را گوهۆڕینان ل هه‌ر ده‌مه‌كى هه‌یه‌ تا لیسته‌ ب كۆمسیۆنێ نه‌هێته‌ پێشكێشكرن.

كورسیێن په‌ڕله‌مانێ كوردستانێ ژ 111 كورسییان بۆ 100 كورسییان هاتینه‌ كێمكرن، ئه‌ڤێ یه‌كێ نه‌رازیبوونا پارتى و پێكهاتێن هه‌رێم كوردستانێ ل پاش خۆ هێلا تا دادگه‌ها فیدرال پێنج كورسى بۆ پێكهاتێن هه‌رێما كوردستانێ ده‌ستنیشانكرین.

ژ وان 100 كوڕسیێن په‌رله‌مانێ كوردستانێ ل هه‌ولێر و سلێمانیێ كورسیه‌ك بۆ كۆتایا كرستیانان و ئێك ژى بۆ توركمانان هاتییه‌ دانان، ل پارێگه‌ها دهۆكێ ژى كوڕسییا كۆتایان بۆ ئه‌رمه‌نان هاتیه‌ دیاركرن.

پێكهاتان پێنج كورسى هه‌نه‌

• هه‌ولێر - كرستیان و توركمان - 2 كورسى
• سلێمانى- كرستیان و توركمان - 2 كورسى
• دهۆك – ئه‌رمه‌ن - 1 كورسى

سلیمانیێ ل سه‌ر ئاستێ هه‌رێما كوردستانێ 38 كوڕسى به‌ر دكه‌ڤن، هه‌لێرێ 34 كورسى و پارێزگه‌ها دهۆكێ ژى 25 كورسى، هه‌لبجه‌ ژى سێ كورسى ژ ئالیێ كۆمسیۆنێ ڤه‌ بۆ هاتینه‌ دیاركرن.