کۆمپانییەکا مسری فێلەکا سەیر ل یانەیەکا کوێتی دکەت
بەلاڤ بکە
گاڤ
یەنایەکا تەپاپێی یا کوێتی ژ لایێ کۆمپانییەکا گەشتیاری یا مسری ڤە ب رەنگەکێ سەیر دهێتە د سەر دا برن و داخوازا قەرەبۆیێ دکەت.
ل گۆرەی سکای نیۆز، یانەیا کازمە یا کوێتی ل رۆژێن بۆری ب مەرەما کرنا یارییەکا هەڤالینی ل گەل یانەیا تلیفۆنات بەنی سوێف چوویە باژێرێ ئەسکەندەرییە ل مسرێ و پشتی یارییێ یانەیا کوێتی د هەژمارێن خۆ یێن تۆڕێن جڤاکی دا بەلاڤکرییە کو د یارییەکا هەڤالینی دا ب ئەنجامێ حەفت گۆلان بەرانبەر گۆلەکێ ب سەر وێ یانەیا مسری ب سەرکەفتییە، لێ یانەیا مسری ئەو بابەت رەت کرییە.
یانەیا تلیفۆنات بەنی سوێف پشتی راگەهاندنا یانەیا کوێتی، راگەهاندییە: وان چ یارییێن هەڤالینی ل گەل چ یانەیێن کوێتی نەکرینە.
پشتی دویڤچوونان دیاربوویە کو کەسەکی خۆ ب ئێک ژ بەرپرسێن دەستەیا کارگێری یا یانەیا بەنی سوێف دایە نیاسین، وی کەسی رێککەفتن ل گەل کۆمپانییەکا گەشتیاری کرییە کو یانەیا کازمە یا کوێتی بۆ یارییەکا هەڤالینی داخواز بکەت، پشتی یانەیا کوێتی رازی بووی، وی کەسی ژمارەیەکا یاریکەران بەرانبەر کۆژمەکێ پارەی رازی کرینە یارییێ ب ناڤێ یانەیا تلیفۆنات بەنی سوێف یارییێ بکەن.
پشتی بابەت ئاشکرا بووی، یانەیا کازمە یا کوێتی داخواز ژ وێ کۆمپانییا گەشتیاری کرییە داخوازا لێبۆرینی ژ هەردو یانەیان بخوازیت و هەر چ تێچوویەکا ماددی ژی ل وێ یارییێ چووبیت، ب ستۆیێ خۆ ڤە بگریت. وێ کۆمپانییا گەشتیاری ژی دان ب شاشییا خۆ کرییە و دیارکرییە کو ئەو ژ ئالییێ کەسەکی ڤە هاتینە د سەر دا برن.
