گاڤ

پشتی رێڤەبەرییا خوەسەر ل رۆژئاڤایێ کوردستانێ لێبۆرینا گشتی بۆ زیندانییان دەرکری، پتری هزار و 200 تیرۆرستێن داعشێ هاتینە ئازادکرن و ترس هەیە پشکەک ژ وان بهێنە پارێزگەها نەینەوا.

فەرماندارییا ئۆپەراسیۆنێن رۆژئاڤایێ نەینەوا دوهی هوشداری دایە هێزێن خۆ کو زێرەڤانییا سنۆران خورت بکەن، ژبەر کو وان زانیاری هەنە 470 تیرۆرستێن داعشێ دێ بزاڤان کەن ژ سوورییێ دەربازی ئیراقێ ببن.

ژێدەری هەروەسا دیارکرییە: پشتی هەسەدێ فەرمانا لێبۆرینا گشتی دەرکری، پتری هزار و 200 تیرۆرستێن داعشێ یێن نە وەلاتییێن سوورییێ هاتینە ئازادکرن، 470 ژ وان خەلکێ پارێزگەها نەینەوانە کو ل دەما ئۆپەراسیۆنێن ل دژی داعشێ ل ئیراقێ دهاتنە کرن، رەڤینە سوورییێ و نوکە ترس هەیە ب رێکێن نەیاسایی ژ سنۆران دەربازی ئیراقێ ببن.