گاڤ – تایبەت 
ل گۆرەی وەزارەتا پلاندانانا ئیراقێ، دهۆک هەژارترین پارێزگەها هەرێما کوردستانێ یە و ئابۆرناسەک ئەگەران دیار دکەت.
د. کاوە عەبدولعەزیز، ئابۆرناس و ماموستایێ زانکۆیێ بۆ گاڤ گۆت: ل گۆرەی داهاتێ نەگۆڕ کو مووچەنە و داهاتێ رۆژانە ژی، داهاتێ خەلکێ دهۆکێ ژ داهاتێ هەموو پارێزگەهێن دی یێن هەرێما کوردستانێ کێمترە و ل گۆرەی پیڤەرێن وەزارەتا پلاندانانا ئیراقێ ژی، دهۆک هەژارترین پارێزگەها هەرێما کوردستانێ یە.
د. کاوە عەبدولعەزیز هەروەسا دبێژیت: ل گۆرەی پیڤەرێن نێڤدەولەتی، هەر کەسێ ل ئیراقێ داهاتێ وی یێ رۆژێ ژ دو پۆینت پێنج دۆلاران کێمتر بیت، ئەو کەس د بن هێلا هەژارییێ دایە و ژ سەدێ هەشت پۆینت پێنج یا خەلکێ پارێزگەها دهۆکێ د بن هێلا هەژارییێ دایە کو داهاتێ وان یێ رۆژێ ژ دو دۆلار و پێنجی سەنتان کێمترە. 
ئەو ماموستایێ زانکۆیێ دبێژیت: داهاتێ هەرێما کوردستانێ یێ باشە، لێ ئەگەرێ هەژارییا دهۆکێ بۆ نەدادپەروەرییێ د دابەشکرنا داهاتی دا ڤەدگەڕیت.