ناڤێ دهۆکێ دچیتە د دیرۆکا وەرزشا ئیراقێ دا

گاڤ

پشتی یانەیا دهۆک وەک ئێکەم یانەیا ئیراقی د دیرۆکێ دا پلێتا پشكدارییێ د جاما یانەیێن کەنداڤی دا وەرگرتی، دەلیڤەیە هەیە ستێڤن جێرارد، یاریکەرێ بەرێ یێ بەرنیاس یێ ئنگلیزی و راهێنەرێ نوکە یێ یانەیا ئیتیفاق یا سعوودی و مارکۆ ڤیراتی، یاریکەرێ بەرنیاس یێ ئیتالی و یاریکەێ نوکە یێ یانەیا عەرەبی یا قەتەری بهێنە دهۆکێ.

هەشت یانەیێن وەلاتێن کەنداڤی پلێتا پشکدارییێ د جاما یانەیێن وەلاتێن کەنداڤی دا وەرگرتییە کو پێک دهێن ژ:

دهۆک – ئیراق

ئیتیفاق – سعوودیە

عەرەبی – قەتەر

قادسیە – کوێت

نەسر – ئیمارات

نەهزە – عومان

ریفاع – بەحرەین

ئەهلی سەنعا – یەمەن

د جاما یانەیێن وەلاتێن کەنداڤی دا دێ دو گرۆپ ب پشککێشانێ هێنە چێکرن، یانەیێن هەر گرۆپەکی دێ دو یارییان ل دژی هەڤدو کەن، هەر یارییەک د گۆرەپانا یانەیەکێ دا و ئەگەر دهۆک کەفتە د گرۆپێ یانەیا ئیتیفاق یا سعوودی دا، ل وی دەمی ستێڤن جێرارد، یاریکەرێ بەرێ یێ ئنگلیزی و راهێنەرێ نوکە یێ یانەیا ئیتیفاق، دێ هێتە دهۆکێ و ئەگەر دهۆک کەفتە د گرۆپێ یانەیا عەرەبی یا قەتەری دا، ل وی دەمی مارکۆ ڤێراتی، یاریکەرێ بەرنیاس یێ ئیتالی و رافینا ئەلکانتارا یاریکەرێ بەرازیلی کو بۆ یانەیا عەرەبی دکەن، دێ هێنە دهۆکێ.

هەرچەندە بۆ ئێکەم جار ل سالا 1981ێ جاما یانەیێن وەلاتێن کەنداڤی بۆ ئێکەم جار هاتییە کرن و تا سالا 2015ێ یا بەردەوام بوو، پاشی هاتبوو راگرتن و ئەڤ سالە جارەکا دی دێ هێتە کرن، لێ تا نوکە چ یانەیێن ئیراقی پشکداری جامێ نەبووینە و دهۆک دبیتە ئێکەم یانەیا ئیراقی پشکداری ڤێ جامێ دبیت و ب ڤێ چەندێ ناڤێ دهۆکێ دچیتە د دیرۆکا وەرزشا ئیراقێ دا.