گاڤ – تایبەت 
ل هەرێما کوردستانێ سال بۆ سالێ ئامارێن تووشبوونێ ب پەنجەشێرێ زێدە دبن، نوشدارەک ب رێکا گاڤ دیارترین ئەگەرێن تووشبوونێ ئاشکرا دکەت.
د. سلێمان محەمەد، شیرەتکارێ وەزارەتا ساخلەمییا هەرێما کوردستانێ بۆ گاڤ گۆت: ل سالا 2020ێ، ل هەرێما کوردستانێ بتنێ 6 هزار تووشبوویێن پەنجەشێرێ هەبوون، لێ ل سالا 2021ێ بووینە 7 هزار و 900 تووشبووی، ل سالا 2022یێ ئەو ژمارە بۆ 9 هزار و 61 کەسان زێدەبوویە و ل سالا 2023یێ ژمارەیا تووشبوویێن پەنجەشێرێ ل هەرێما کوردستانێ گەهشتییە 9 هزار و 911 کەسان.
ب ڤی رەنگی، رێژەیا تووشبوونێ ب پەنجەشێرێ ل هەرێما کوردستانێ د چار سالێن بۆری دا، ب رێژەیا نێزیکی ٪40 زێدەبوویە، لێ شیرەتکارێ ساخلەمییا هەرێمێ دبێژیت: وەک رێژە هەرێما کوردستانێ ژ گەلەک وەلاتان باشترە و نوکە هشیارییا ساخلەمییێ ژی ژ بەرێ باشترە، گەلەک وەلاتی پشکنینان بۆ خۆ دکەن و ل دەما تووشی پەنجەشێرێ دبن، ژ بەرێ زویتر دزانن و چارەسەرییان بێبەرانبەر ژ حکومەتێ وەردگرن.
د. سلێمان محەمەد، دەربارەی ئەگەرێن تووشبوونێ دبێژیت: پیساتییا ژینگەهێ، کێشانا جگارە و نەرگیلەیان، خوارنا زێدە و نەلڤین و ڤەخوارنێن کحۆلی ئەگەرن کو ل هەرێما کوردستانێ پەنجەشێر زێدەبووی.