گاڤ

ئەڤ سالە ل ئیراقێ پتر ژ 8 هزار کەسان ب تاوانا بکارئینان و بازرگانیکرنێ ب ماددەیێن هشبەر هاتینە گرتن و دەست ب سەر پتر ژ دو تەنێن وان ماددەیان دا هاتییە گرتن.

لیوا موهەنەد حاتم، رێڤەبەرێ پشکا یاسایی ل رێڤەبەرییا کاروبارێن ماددەیێن هشبەر ل ئیراقێ ب رێکا ئاژانسا نووچەیێن ئیراقی راگەهاند: ئەڤ سالە ژ مەها کانوینا دویێ تا دویماهییا تیرمەهێ، پتر ژ 8 هزار کەسان ب تاوانا بکارئینان یان بازرگانیکرنێ ب ماددەیێن هشبەر هاتینە گرتن و ب حوکمێن جودا هاتینە زیندانکرن.

ژێدەری هەروەسا دیارکرییە: هەڤدەمی گرتنا وان کەسان، دەست ب سەر پتر ژ 2 تەنێن ماددەیێن هشبەر دا هاتییە گرتن و هندەک ژ تاوانباران کو بازرگانێن مەزن بوون، حوکمێ سێدارەدانێ بۆ دەرچوویە.

هەرچەندە ماددەیێن هشبەر ل ئیراقێ ناهێنە بەرهەمئینان، لێ ژ بەر کو ئەو ماددە ژ وەلاتێن هەڤسۆ دهێنە د ناڤ ئیراقێ دا و ئیراق وەک سەنتەرەکێ بەلاڤبوونا وان ماددەیانە بۆ جیهانێ، بکارئینان ژی ل ئیراقێ رۆژ بۆ رۆژێ زێدە دبیت.