تەرمێ ئیسماعیل هەنییەی دێ ل قەتەرێ هێتە ڤەشارتن
گاڤ
تەرمێ سەرۆکێ مەکتەبا سیاسی یا حەماسێ ئەڤرۆ دێ ل قەتەرێ هێتە ڤەشارتن و سەرۆکێ ئەمریکا دبێژیت: کوشتنا هەنییەی د بەرژەوەندییا ئاگربەستێ دا نینە.
بریارە ئەڤرۆ تەرمێ ئیسماعیل هەنییە، سەرۆکێ مەکتەبا سیاسی یا تەڤگەرا حەماسێ ل باکۆرێ باژێرێ دەوحە، پایتەختێ قەتەرێ بهێتە ڤەشارتن، بەرپرسێن هندەک وەلاتان بۆ پشکدارییێ د مەراسیمان دا چووینە قەتەرێ و ئیرانێ محەمەد رزا عارف، جێگرێ ئێکێ یێ سەرۆککۆماری بۆ پشکدارییێ د مەراسیمان دا هنارتییە قەتەرێ.
ئیسماعیل هەنییە، سەرۆکێ مەکتەبا سیاسی یا حەماسێ ل رۆژا چارشەمبییا بۆری بۆ پشکدارییێ د رێورەسمێن دەستبکاربوونا مەسعوود پزیشکییان، سەرۆکێ ئیرانێ چووبوو وی وەلاتی و ئسرائیلێ هەنییە ل تەهرانێ کرە ئارمانج و کوشت.
جۆ بایدن، سەرۆکێ ئەمریکا دەربارەی کوشتنا هەنییەی ئەڤرۆ راگەهاند: ب رەوشا نوکە یا رۆژهەلاتا ناڤین ئەو گەلەک دلگرانە و کوشتنا ئیسماعیل هەنییەی د بەرژەوەندییا ئارامکرنا رەوشێ و ئاگربەستێ دا نەبوو.