ئێک ژ تایبەتمەندیێن بهێز یێن هەرێما کوردستانێ دناڤ جڤاکا ناڤدەولەتی دا پێکڤەژیانە... چەندین جاران د راپۆرتێن نەتەوەیێن ئێکگرتی و کۆمبوونێن ناڤدەولەتی دا ئاماژە ب هندێ هاتیە کرن کو پێکڤەژیانا پێکهاتە و ئایینان ل هەرێما کوردستانێ د ئاستەکێ بلند دا یە، رۆلێ سەرۆکێ هەرێما کوردستانێ ژی یێ دیارە کو چەندین جاران پلاسخارتێ نوینەرا نەتەوەیێن ئێکگرتی د راپۆرتێن خۆ دا ل جڤاتا ئاسایشا ناڤدەولەتی پەسنا بزاڤێن وی کریە کو نەهێلایە ئالۆزی دروست ببن، هەڤدەم سەرۆکایەتییا هەرێما کوردستانێ کرییە سەیوانەیا پێکڤەژیانێ. 
یاسایا پێکهاتەیان ژی ئەڤە چەندین سالە کو ل پەرلەمانێ کوردستانێ هەیە، کو تێدا زمان و فەرهەنگ و ممارسەیا سیاسی و ژیانکرنا ب ماف، بۆ وان بوویە پارێزڤانەکا بهێز، هەردەم سەرۆکێ هەرێما کوردستانێ دبێژیت، دڤێت پێکڤەژیان و تەبایی ل هەرێما کوردستانێ ل گۆپیتکێ بیت.
لەوما ژی خالەکا بهێز کو ناسنامەیا هەرێما کوردستانێیە د ڤێ جیهانێ دا ئەڤ پێکڤەژیانەیە. کو هەرێم د ڤێ خالێ دا خودانا پێشەنگیا خۆ یە ل ڤێ ناڤچەیێ. نوکە ژی ب تۆخکرنا ڤێ پێکڤەژیانێ ئەم دشێن ل پاشەڕۆژێ زێدەتر ئاشتی و پێکڤەژیانێ  بهێزتر بکەین.
د ڤی دەمی دا پێدڤیە ئەم هەمی بزاڤێن زێدەتر بکەین کو نەهێلین چو دەرزەک بکەڤیتە دناڤبەرا پێکهاتەیێن نەتەوەیی و ئایینی. ئەگەر شاشیەک هەبیت ژی، نابیت ل سەر پێکهاتەیەکا ئایینی بهێتە حسابکرن، هەردەم کورد و کوردستانی ب هندێ د پێشەنگن کو دشێن ب لێبۆرینێ پێگەهێ هەرێما کوردستانێ بهێزتر بکەن.
هەرێما کوردستانێ ژ رویێ پێکڤەژیانێڤە ل ناڤچەیێ وەکی ئەلماسییە. لەوما ژی دێ ئەڤ ئەلماسە پتر برسقیت دەمێ کو د کویراتییا جڤاکی دا ئەڤ باوەریا بهێز هەبیت. 
هەرێما کوردستانێ د قویناغەکێدا یە کو ب پیڤەرێن راپۆرتێن جیهانی د ئاستا پێکڤەژیانێدا نمۆنەیا بلند یا رۆژهەلاتا ناڤینە. لەوما ژی ئەوا کو جهێ دلخۆشیێیە چو بزاڤەک ل چو جهەکی نەشێت ڤالاهیەکێ بئێخیتە دناڤ وێ کویراتییێ دا یا کو پێکڤەژیانێ د ناڤ جڤاکی دا هەیی.
کوردستان ژی ب هەمی رەنگ و دەنگان، ب هەمی نەتەوە و ئایینانێن خۆ ڤە ئەو نیشتیمانە کو پاشەڕۆژەکا بهێز هەیە. ئەڤە ژی ژێدەرەکێ بهێزە بۆ کوردستانەکا بهێز و دیمۆکراسی.