سه‌باح: ل نیۆیۆرك كۆنگره‌یه‌كێ تایبه‌ت ب كه‌مپا هۆلێ ڤه دێ هێته‌كرن
بەلاڤ بکە
گاڤ
رۆژنامه‌یا سه‌باح یا فه‌رمى یا ئیراقێ راگه‌هاند، ڤێ مه‌هێ كۆنگره‌یه‌كێ تایبه‌ت بۆ چاره‌كرنا چاره‌نڤیسێ كه‌مپا هۆلێ ل نیۆیۆك دێ هێته كرن.
سه‌عید جه‌یاشى، شیره‌تكارێ كاروبارێن ستراتیژى د كۆنگره‌یێ ئاساییشا نه‌ته‌وه‌یى یا ئیراقێ دا بۆ رۆژنامه‌یا سه‌باح، یا فه‌رمى یا ئیراقێ گۆت: ل نیۆیۆرك كۆنگره‌یه‌كێ تایبه‌ت ب چاره‌نڤیسێ كه‌مپا هۆلێ دێ هێته كرن و ئیراق ژى دێ پشكداریێ تێدا كه‌ت و ئیراق دبینیت ب زووترین ده‌م ئه‌و كه‌مپ ژ كه‌س و كارێن داعشان بهیته چوولكرن و هه‌ر وه‌لاته‌ك گرتیێن خۆ وه‌رگریت.
هه‌روه‌سا دیاركر، ئه‌و كه‌مپ مه‌ترسییه‌كا مه‌زنه و ناهێته زانین ل هه‌ر ده‌مه‌كى ب په‌قیت و ژ كۆنترۆلێ ده‌ركه‌ڤیت و ده‌ركه‌فتنا 55 هزار كه‌سان ژى كێشه‌یه‌كا مه‌زنه و ئه‌گه‌ر بهێته پرت پرت كرن و ره‌وانه‌یى وه‌لاتێن وان بهێنه كرن كێشه دێ ب ساناهیتر هێته چاره‌كرن.
جه‌یاشى ئاشكراكر ژى، تا نوكه 14 وه‌لاتان كو هنده‌كان وه‌رگرتینه ژى به‌رهه‌ڤییا خۆ بۆ وه‌رگرتنێ دیاركریه، پترییا وه‌لاتان ژى ناخوازن وان وه‌رگرن و ب مه‌ترسى ل سه‌ر وه‌لاتێ خۆ د زانن.
ل گۆڕه‌یى راپۆرتێن جیهانى زێده‌تر ژ 44 هزار ژن و زاڕۆكێن داعشان د ناڤا كه‌مپا هۆلێ دا ماینه و وه‌لاتیێن 60 وه‌لاتانه، پێشتر ل سه‌ر داخوازا نه‌ته‌وه‌یێن ئێكگرتى ئیراقێ هنده‌ك بۆ وه‌لاتێ خۆ ڤه‌گه‌ڕاندینه.
ل گۆڕه‌یى ژێده‌رێن ئیراقى پێنج هزار خێزانێن ئیراقى د ناڤا وێ كه‌مپێ دا هه‌نه كو هه‌ژمارا وان 18 هزار كه‌سن و ئیراق دیاردكه‌ت، ئه‌گه‌ر پشته‌ڤانییا نێڤده‌وله‌تى نه‌بیت كێشه‌یه‌كا مه‌زن د وه‌رگرتنا وان دا هه‌یه.
