گاڤ

ئسرائیلێ شڤێدی ژمارەکا هێرشان کرنە سەر باژێڕەکێ پارێزگەها حەما یا سووری و ل گۆرەی ئاژانسا فەرمی یا وی وەلاتی، 57 کەس بووینە قوربانی.

ئاژانسا فەرمی یا سوورییێ سانایێ راگەهاند: ئسرائیلێ ب چەندین مۆشەکان باژێڕێ مەسایف ل پارێزگەها حەمایێ کرە ئارمانج و د وان هێرشان دا 14 وەلاتییێن سڤیل ژیانا خۆ ژ دەست دا و 43 کەسێن دی بریندار بوون کو برینێن هندەک ژ وان دگرانن.

ژ ئالییێ خۆ ڤە، مەدیایێن ئسرائیلی دبێژن: هێزێن ئاسمانی یێن ئسرائیلێ ب فرۆکەیان 15 هێرشێن کرینە سەر باژێرێ مەسایف ل حەمایێ و د وان هێرشان دا بنگەهێن هێزێن چەکدار یێن سەر ب ئیرانێ ڤە کرینە ئارمانج.

هەرچەندە دەما پتری 10 سالانە دەم بۆ دەمی ئسرائیل هێرشان دکەتە سەر سوورییێ، لێ ژ مەها چریا ئێکێ یا پار و ل گەل دەستپێکرنا شەڕێ ئسرائیل و حەماسێ، هێرشێن ئسرائیلێ بۆ سەر سوورییێ زێدەبووینە.