گاڤ

ل تورکیا د هەیاما 20 رۆژێن بۆری دا، 24 کەس ب گومانا کوشتنا کچەکا 8 سالی هاتینە گرتن و هەڤدەمی بەردەوامییا لێکۆلینان، مەزنە بەرپرسێن وی وەلاتی دویڤچوونا بابەتی دکەن.

نارین لوقمان، کچەکا 8 سالی یا ئاکنجییا باژێڕێ ئامەدێ ل باکۆرێ کوردستانێ بوو، ل رۆژا 21 تەباخا بۆری ل دەما ژ کۆرسەکێ خواندنا قورئانێ ڤەدگەڕیا مال، بێسەروشوین ببوو و پشتی 19 رۆژان ژ بێسەروشوینبوونێ، دوهی تەرمێ وێ ل بەر لێڤا ئاڤەکێ ب دویراتییا کیلۆمتر و نیڤان ژ مالا وێ د ناڤ گوینیکەکی دا ل بەر لێڤا ئاڤەکێ هاتە دیتن.

یەلماز تونج، وەزیرێ داد یێ تورکیا دەربارەی ڤێ تاوانێ راگەهاند: ئەو ب هویری ل سەر کەیسا کوشتنا نارینێ راوەستیاینە، ژ رۆژا بەرزەبوونا وێ تا شڤێدی، 24 گومانلێکری هاتینە گرتن کو دایک و باب و برا و دو مامێن نارینێ ژی د ناڤ دانە و هەر کەسێ ئەو تاوان کربیت، ژ سزای رزگار نابیت.

رەجەب تەیب ئەردۆگان، سەرۆککۆمارێ تورکیا دەربارەی ڤێ تاوانێ ل تۆرا جڤاکی یا ئێکس پەیامەک بەلاڤ کر و راگەهاند: ئەوێن نارین کوشتی، دێ دژوارترین سزا وەرگرن.

سەلاحەدین دەمیرتاش، هەڤسەرۆکێ بەرێ یێ هەدەپێ د ناڤ زیندانێ دا پەیامەک بەلاڤ کر و تێدا نڤیسییە "خرابی و بێرەوشتییێ سنۆر نینن، ناسنامە، باوەری و نشتیمان نینن، هەرچەند چوونا ب ڤی رەنگی جیهانێ تاڕیتر بکەت، خەباتا مە ژ پێخەمەت رۆنکرنێ دێ بەردەوام بیت، نارین ل مە هەمییان ببۆرە".

ل وەزارەتا ناڤخۆ یا تورکیا ژی کۆمبوونەکا تایبەت ب کەیسێ کوشتنا نارینا 8 سالی ب سەرپەرشتییا وەزیرێ ناڤخۆ یێ وی وەلاتی هاتە کرن و تا نوکە ئەنجامێن لێکۆلینان ب فەرمی نەهاتینە راگەهاندن.