گاڤ

کێشە د ناڤبەرا سەرۆکێ هەڤپەیمانییا دەولەتا یاسایێ و سەرۆکوەزیرێ ئیراقێ دا چێبووینە و دبیت سەرۆکوەزیر نەچار ببیت دەستژکار بکێشیت.

رۆژنامەیا شەرقولئەوسەت ل گۆرەی هندەک ژێدەرێن ناڤ چارچووڤەیێ هەماهەنگییێ ئاشکرا کر: ل رۆژا 26-8-2024ێ سەرکردەیێن چارچووڤەیێ هەماهەنگییێ ب ئامادەبوونا نوینەرێ جڤاتا دادوەرییا ئیراقێ کۆمبوونەک کرییە، د وێ کۆمبوونێ دا ب دزی ڤە دەنگ هاتینە ریکۆردکرن و گۆمان ل سەر هندەک کەسێن نێزیکی محەمەد شیاع سوودانی، سەرۆکوەزیرێ ئیراقێ یە.

ژێدەری ئاشکرا ژی کر: پشتی وێ گۆمانێ، نووری مالکی، سەرۆکێ هەڤپەیمانییا دەولەتا یاسایێ ژمارەکا مەرجان داناینە بەر سوودانی کو گەر بجهـ نەئینیت، پێدڤییە دەستژکارکێشانا خۆ رابگەهینیت بەری ب بریارا چارچووڤەیێ هەماهەنگییێ ژ کارێ وی بهێتە لادان.

ل گۆرەی شەرقولئەوسەت، مەرج ئەڤێن ل خوارێ نە:

• پێدڤییە سوودانی برێڤەبرنا دەزگەهێ هەوالگیرییا ئیراقێ رادەستی چارچووڤەیێ هەماهەنگییێ بکەت.
• پێدڤییە سوودانی هەمی خزم و کەسوکارێن خۆ ژ سازییێن گرنگ یێن دەولەتێ لابدەت.
• پێدڤییە سوودانی سۆزێ بدەت کو د هەلبژارتنێن بهێن دا خۆ بەربژار نەکەت.

ژێدەر ئاماژێ ددەت کو سوودانی ئەڤ مەرجە رەت کرینە و د هەمان دەم دا، چارچووڤەیێ هەماهەنگییێ ل سەر سێ بەرەیان دابەشبوویە، لەورا دبیت حکومەت بهێتە هەلوەشاندن و هەلبژارتنێن پێشوەخت بهێنە کرن.