ئیرانێ ئارمانجا سەرەدانا پزیشکیان بۆ ئیراقێ ئاشکرا کر
بەلاڤ بکە
گاڤ
وەزارەتا دەرڤە یا ئیرانێ ئارمانجا سەرەدانا پێشبینیکری یا سەرۆککۆمارێ ئیرانێ بۆ ئیراقێ ئاشکرا کر و راگەهاند؛ مەرەم ژ سەرەدانێ دروستکرنا ئاسایشەکا جێگیرە ل دەڤەرێ.
ناسر کەنعانی، پەیڤدارێ وەزارەتا دەرڤە یا ئیرانێ راگەهاند؛ ئارمانج ژ سەردانا مەسعوود پزیشکیان، بۆ ئیراقێ بلندکرنا ئاستێ پەیوەندیێن دوستانەیە د ناڤبەرا تەهران و بەغدایێ دا د بوارێن جودا دا ژ بەر کو هەردو وەلات د بوارێ ئەمنی دا پێتڤی ب هێزکرنا سەقامگری و ئاسایشێ یە ب درێژهییا سنۆرێ هەڤپەشک.
کەنعانی دا زانین: ئارمانج ژی گۆهرینا سنۆرانە بۆ سنۆرەکێ سەقامگیرتر کو ژ کارێن پێشینەیێن هەردو وەلاتانە د بوارێ ئەمنی دا، تەهرانێ بەری نوکە ژی رێککەفتنا هاریکارییا ئەمنی لگەل ئیراقێ کریە.
پەیڤدارێ وەزارەتا دەرڤە یا ئیرانێ دیار کر: ژ چەککرنا هێزێن جوداخاز ژ کارێن پێشینەیێن ئیرانێ یە کو پشکەکا ئاخا ئیراقێ وەک پەناگەهەک بۆ نەسەقامگیریکرنا دەڤەرێ ب کاردئینن و گۆت؛ سەرەدانا پزیشکیان بابەتێ ئەمنی یێ دەڤەرێ و روویبریبوونا ئەوان گرۆپان د چارچووڤەیێ رێککەفتنێ دا، دێ ژ مژارێن سەرەکی بیت.
