رێڤەبەرا بەرێ یا بانکەکا ئیراقی ب سێ سالێن زیندانکرنێ هاتە سزادان
بەلاڤ بکە
گاڤ
رێڤەبەرا بەرێ یا بانکەکا ئیراقی ب سێ سالێن زیندانکرنێ هاتە سزادان، پشتی دیار بووی کو ب ناڤێ خەلکی بێ کو ئاگەهـ ژێ هەبیت پارە ژ بانکێ کێشابوون.
دەستەیا دەستپاکییا ئیراقێ راگەهاند؛ فاتیمە رەشید جاسم شەبیب قەرەغولی، رێڤەبەرا بەرێ یا لقەکا بانکا رەشید ل پارێزگەها دیالا ب تۆمەتا زیانگەهاندنا ئەنقەست ب داراییا گشتی سزایێ سێ سالێن زیندانێ بۆ هاتە دەرکرن.
دەستەیا دەستپاکییا ئیراقێ د بێژیت: ل وی دەمێ ئەو رێڤەبەرا وێ بانکێ، قەرێ کرینا ترومبێلان ب ناڤێ ژمارەکا کەسان کێشابوو بێ کو وان کەسان ئاگەهـ ژ بابەتی هەبیت.
سکالا ژ ئالییێ نوونەرێ یاسایی یێ بانکا رەشید یا حکومی لسەر تۆمەتبارێ هاتییە کرن و د لێکۆلینان دا دەرکەفتییە رێڤەبەرا بانکێ بەرپرسە ژ ئیمزاکرنا مامەلەیان.
دادگەهێ ژی بریار دایە دەست ب سەر مالێ ڤەگۆهاستی و نەڤەگۆهاستی یێ تۆمەتبارێ دا بهێتە گرتن هەروەسا ماف دایێ سەرەدانا دادگەهان بکەت ب مەرەما تانەدانێ ب بریارێ.
