گاڤ

جڤاتا وەزاری یا ئیراقێ بۆ کاروبارێن ئابۆری و جڤاتا ئابۆری یا هەرێما کوردستانێ راگەهاندنەکا هەڤپشک دەربارەی ئەنجامێن دو رۆژێن کۆمبوونان بەلاڤکر.

د راگەهاندنێ دا هاتییە، د دەما دو رۆژان دا، ژمارەکا بابەتێن جهێ گرنگیپێدانێ یێن هەڤپشک د ناڤبەرا حکومەتا فیدرالی و حکومەتا هەرێمێ د سەقایەکێ ئارام  و ئەرێنی دا هاتنە بەحسکرن، کو هندەک ژوان بریار دەربارەی وان هاتنە دان و یێن دی ژی وەکو راسپاردە ئارستەیی جڤاتا وەزیرێن فیدرالی هاتنەکرن و دوپاتی ل بەردەوامبووا دانوستاندنان هاتەکرن بۆ چارەکرنا وان پرسان کو پێدڤی ب کۆمبوون و دیدارێن پترە.

جڤاتا وەزاری یا ئابۆری بریاردا راسپاردەیەک بۆ جڤاتا وەزیرێن ئیراقێ یا فیدرالی بهێتە پێشکێشکرن و تێدا وەزارەتا دارایی یا فیدرالی بۆ چارەکرن و هنارتنا مووچەیی راگرتی یێ هەرێمێ یێن ژ ئەگەرێ نەتەمامکرنا بایۆمەتری هاتینە راگرتن، هاتیە راسپاردن.

هەروەسا دانوستاندن دەربارەی هندەک پرسێن پەیوەندیدار برۆژنامەیا کشتوکالی، موولەتا هنارتن و هاوردەکرنێ، موولەتا کارگەهان، تۆمارکرنا کۆمپانیان، پۆلینکرنا بەلێندەران، دەرگەهێن سنۆری، گومرک، دوسەیا پەترۆلێ، وزە و کەرتێ بەنکی هاتەکرن.

راسپاردەیەکا دی یا جڤاتا وەزاری بۆ ئابۆری، بەردەوامبوونا کارکرنا لژنەیا هەڤپشکا د ناڤبەرا وەزارەت و کەرتێن پەیوەندیدار دا بۆ تەمامکرنا ئەو ئەرکێن ب وان هاتینە راسپاردن ژ پێخەمەت گەهشتن ب لێکتێگەهشتنەکا هەڤپشک کو دبەرژەوەندییا هەمی وەلاتیێن ئیراقێ دا بیت.

هەروەسا جڤاتا وەزاری پێشنیازا ئەنجامدانا کۆمبونەکا تایبەت د ئاستێ بلند دا دکەت ژبۆ دانوستاندنێ د بوارێن دوسەیێن پەترۆل،وزە، دەرگەهێن سنۆری و گۆمرکان.

ل داویێ داخوازا جڤاتا ئابۆری یا هەرێما کوردستانێ کر بۆ ئەنجامدانا کۆمبوونەکا هەڤپشک لگەل جڤاتا وەزاری بۆ ئابۆری ل بەغدا.