سەرۆک نێچیرڤان بارزانی تایبەت بۆ گاڤ دئاخڤیت
بەلاڤ بکە
گاڤ – تایبەت
سەرۆکێ هەرێما کوردستانێ ئەڤرۆ د بەردەوامییا سەرەدانا زاخۆ دا، چوو کۆرنیشێ زاخۆ و ل سەر پرا دەلال بۆ گاڤ گۆت: ئەو خۆشحالە سەرەدانا زاخۆ کری و ئەو پێشڤەچوونا زاخۆ ب خۆ ڤە دیتی جهێ خۆشحالییا وی یە.
نێچیرڤان بارزانی، سەرۆکێ هەرێما کوردستانێ د چارچووڤەیێ سەرەدانا خۆ یا زاخۆ دا ل سەر پرا دەلال د بەرسڤا پرسیارەکا نۆح سلێمان، پەیامنێرێ گاڤ دا گۆت: جهێ خۆشحالییێ یە بۆ ئێکەم جار وەک سەرۆکێ هەرێما کوردستانێ ئەو سەرەدانا زاخۆ دکەت و ئەو پێشڤەچوونا زاخۆ ب خۆ ڤە دیتی، جهێ خۆشحالییا وی یە و دەستخۆشییێ ل گوهدار شێخۆ، سەرپەرشتێ ئیدارەیا سەربەخۆ یا زاخۆ و هەر کەسەکێ بوویە ئەگەرێ وێ پێشڤەچوونێ دکەت.
سەرۆک نێچیرڤان بارزانی د بەردەوامییا گۆتنێن خۆ دا بەحسا بانگەشەیا هەلبژارتنێن پەرلەمانێ کوردستانێ کر و گۆت: ئەو دخوازن بانگەشە د سەقایەکێ ئارام دا بهێتە کرن و چ ئالیێن سیاسی و بەربژار ناڤزراندنێ نەکەن.
دەربارەی رەوشا ئابۆری و دارایی یا هەرێما کوردستانێ، نێچیرڤان بارزانی، سەرۆکێ هەرێما کوردستانێ ئاماژە دا سەرەدانێن شاندێن حکومەتا هەرێما کوردستانێ بۆ بەغدایێ و گۆت: دەربارەی گیرۆبوونا مووچەیان ئەو لێبۆرینێ ژ خەلکێ هەرێما کوردستانێ دخوازن و و ژ نوکە وێڤە هنارتنا مووچەی ژ ئالییێ بەغدایێ ڤە نەمایە کێشە.
دەربارەی بابەتێ هنارتنا پەترۆلا هەرێما کوردستانێ، سەرۆک نێچیرڤان بارزانی راگەهاند: ل دەمەکێ نێزیک هەرێما کوردستانێ دێ دەست ب هنارتنا پەترۆلێ کەت.
