گاڤ

سوبەهی ب فەرمی دێ لیستا ناڤێن وانەبێژان ب مەرەما گرێبەستکرنێ بۆ ئیراقێ هێتە هنارتنگاڤ

نوینەرەکێ مامۆستایێن وانەبێژ راگەهاند؛ سوبەهی ب فەرمی دێ لیستا ناڤێن وانەبێژان ب مەرەما گرێبەستکرنێ بۆ وەزارەتا دارایی یا ئیراقێ هێتە هنارتن.

عەلی رەئووف، نوینەرێ مامۆستایێن وانەبێژ بۆ گاڤ گۆت: جڤاتا وەزیرێن هەرێما کوردستانێ رازیبوون ل سەر ب گرێبەستکرنا مامۆستایێن وانەبێژ دایە و سوبەهی رۆژا دوشەمبی دێ ب فەرمی بۆ وەزارەتا دارایی یا ئیراقێ هنێرن و ب فەرمی دێ بنە گرێبەست و مووچەیێ وان هێتە دەستنیشانکرن.

ل رۆژا 25ێ هەیڤا بۆری حکومەتا هەرێما کوردستانێ ب فەرمی بریاردا مامۆستایێن وانەبێژ ببنە گرێبەستێن هەردەمی و ل رۆژا 13/9/2024 لژنەیا تایبەتمەند یا وەزارەتا پەروەردێ هویربینی بۆ لیستا ناڤێن وان کر و زانیاریێن وان تەمامکرن و بۆ جڤاتا وەزیرێن هەرێما کوردستانێ هنارتن و رازیبوون ژی ل سەر هاتەدان.

پتری 38 هزار مامۆستایێن وانەبێژ ل هەرێما کوردستانێ هەنە، نوکە پارەیێ وان د ناڤبەرا 250 بۆ 400 هزار دیناران دایە و پشتی دبنە گرێبەست دێ گەهنە 400 تا 500 هزار دیناران.