گاڤ

دیرۆکنڤیسەک کو دەما 24 سالانە پێشبینیێن وی بۆ هەلبژارتنێن سەرۆکاتییا ئەمریکا دروست دەردکەڤن، ب دویر دبینیت ترامپ جارەکا دی ببیتە سەرۆکێ ئەمریکا.

ئەلن لێختمەن، ماموستایەکێ دیرۆکێ یێ 77 سالی یە، ئەو وانەیان ل زانکۆیا هارڤارد یا ئەمریکی دبێژیت، هەرچەندە لێختمەن ئالیگرێ پارتییا دیمۆکرات یا ئەمریکی یە، لێ ل دەما ئەو پێشبینییان ددەت، ب بێلایەنی هزر دکەت.

د هەلبژارتنێن سالا 2016ێ دا، لێختمەنی و ژمارەکا کێم یا شارەزا و بسپۆران پێشبینی کربوو کو دۆنالد ترامپ ب سەر هیلاری کلینتۆنێ سەربکەڤیت.

ڤی دیرۆکنڤیسێ ئەمریکی، ل سالا 2008ێ ژی ب ئاشکرایی دگۆت: بۆ ئێکەم جار رەشپیستەک دێ بیتە سەرۆکێ ئەمریکا و پێشبینییا وی دروست دەرچوو و باراک ئۆباما ل وی دەمی بوو سەرۆکێ ئەمریکا.

د هەلبژارتنێن بۆری یێن ئەمریکا دا لێختمەنی پێشبییا سەرکەفتنا بایدنی کربوو و ل سالا 2004ێ ژی پێشبینییا سەرکەفتنا جۆرج دەبلیۆ بۆشی کربوو.

ئەو رێبازا لێختمەن ل دویڤ دچیت داکو پێشبینییا خۆ بدەت، سێزدە پیڤەر تێدا هەنە کو ئەو پیڤەر گرێدای پلانێن ئابۆری، کارێزما بەربژاری، رەوشا وی دەمی یا دیمۆکرات و کۆمارییان، و بەربژارێن پارتییێن دی ب خۆ ڤە دگرن و پیڤەر ژی لێختمەنی و زانایەکێ بیرکارییێ ل سالا 1981ێ داناینە.

لێختمەن ل دەما دیارکرنا پێشبینییا خۆ، پشتبەستنێ ل سەر راپرسییان ناکەت و بۆ ڤێ گەڕا هەلبژارتنێن سەرۆکاتییا ئەمریکا، ئەلن لێختمەن دبێژیت: کامالا هاریس دێ ب سەر دۆنالد ترامپی سەرکەڤیت.

ژبلی پێشبینییا ڤی دیرۆکنڤیسێ ئەمریکی، پشتی جۆ بایدن، بەربژارێ دیمۆکراتان خۆ ژ هەڤڕکییا سەرۆکاتییا ئەمریکا ڤەکێشای و کامالا هاریس ب فەرمی بوویە بەربژارا دیمۆکراتان، د راپرسییان دا کامالا ب پێش ترامپی کەفتییە و ل گۆرەی دویماهی راپرسییا تۆڕا "سی بی ئێس" یا ئەمریکی، نوکە ٪52 یا ئەمریکییان ل گەل کامالایێ نە و ٪48 پشتەڤانێن ترامپی نە.