گاڤ

ئەردۆغانی د گۆتارەکێ دا راگەهاند، ئسرائیل هەمی بزاڤان دکەت کو وەلاتێن ناڤچەیێ رابکێشیتە ناڤ ئاگرێ خۆ و ئارمانجا وێ ئەوە ئاگری د هەمی ناڤچەیێ بەربدەت.

سەرۆککۆمارێ تورکیا رەجەب تەیب ئەردۆغانی ل پەرلەمانێ تورکیا د گۆتارەکێ دا راگەهاند، تیرۆر و جینۆسایدا ئسرائیلێ پشتی فلستینێ گەهشتیە لوبنانێ ژی، پشتی کوشتنا 42 هزار کەسان ل غەززەیێ دڤێت داگیرکاریێ ل هەمی ناڤچەیێ بکەت و ل بەرانبەری ڤێ چەندێ، ئەم چ کارڤەدانێن پیدڤی ل جیهانێ نابینین. د دەمەکی دا کو غەززە یا بوویە ئۆردیگایەکا مەزن یێ قڕکرنێ.

د درێژاهیا گۆتارا خۆ دا سەرۆککۆمارێ تورکیا گۆت: ل سەر بنیاتێ وەهما خۆ یا ب ناڤێ 'ئاخا سۆزپێدایی'، پشتی فلستین و لوبنانێ ئسرائیلێ چاڤ ل سەر ئاخا مە یە. هەمی حسابێن ئسرائیلێ ل سەر وێ بنیاتینە کو دەستدرێژیێن ئسرائیلێ دێ تورکیا ژی ڤەگەرن. لێ ئەم دێ ب هەمی شیانێن خۆ ل دژی ڤێ تیرۆرا دەولەتی راوەستین، هەکەر باجا وێ چ بیت ژی، تورکیا دێ یا بەردەوام بیت ل سەر دژایەتیا ئسرائیلێ.

ئەردۆغانی گۆت ژی؛ ئسرائیل وەکی دێوەکی بێی کۆنترۆل ل دەوروبەرێن مە دخوازیت سەرژنوی سنۆران بکێشیت. ئەز ئسرائیلێ ئاگەهدار دکەم کو ئۆپەراسیۆنێن هشکاتی بۆ سەر ئاخا لوبنانێ وەکی داگیرکاریێن بەرێ نابیت و ئەم چو جاران برایێن خۆ یێن لوبنانی بتنێ ناهێلین.  

شەڤا بۆری سۆپایێ ئسرائیلێ هێرشا هشکاتی ل باشوورێ لوبنانێ دەستپێکر و ڤێ چەندێ کارڤەدانێن بەرفەەهـ ل سەر ئاستێ ناڤچە و جیهانێ هەبوون. پشتی گۆتارا ئەردۆغانی، سەرۆکێ پەرلەمانێ تورکیا نۆمان کورتولووشی ژی راگەهاند، رەفتارێن شەڕخوازی یێن ئسرائیلێ گەفن ل سەر ئێکپارچەیی و سەروەرییا هەمی وەلاتێن ناڤچەیێ و ئەو دخوازیت ل سەر بنیاتێ بیروباوەرێن ئایینی، ژ نیلی هەتا فۆراتێ داگیر بکەت و ئێک ژ ئارمانجێن وێ تورکیایە.