خواندنەکا دەرۆنی و سسیۆلۆژی، بۆ خالێن بهێز و لاواز یێن پارتی

رێبەر کوردۆ

1: دیراسەتکرنا رەوشا هەڤرکی:

پارتی شیا هەتا رادەیەکێ باش دیراسەتا رەوشا هەڤرکێ خوە بکەت، راستە د ئەڤان هەلبژارتنان دا، پارتی دخواست تنێ دەنگدەرێ خوە ب پارێزیت، بەلێ ل گەل هندێ ژی تنێ د چاڤێ حزب و ئالیگرێن خوە دا، تەماشەی رەوشێ نەدکر، بەلکی دچاڤ و دیتنێن ئالیگرێن حزبێن دیتر دا ژی، تەماشەی رەوشێ د کر! وەکی وێ یا سالا 1972 ل ئەمریکا رویدای، دەمێ هەڤرکی دناڤبەرا جۆرج مەکگۆڤێرن کاندیدێ/ دیمۆکراتان و ڕیچارد نیکسن کاندیدێ/ کۆماریان چێبووی، ئالیگرێن جۆرجی هوسا هزردکر، کۆ دێ رێژا دەنگێن هەردۆکا نێزیکی ئێك بن. بەلێ ئەنجام هۆسا دەرکەت، کۆ رێژەیا دەنگێن نیکسنی، گەلەك ژ یێن جۆرجی پتر بوون. دبێژنە ڤێ دیاردەیێ (هەڤهزریا خەلەت) ئانکۆ تۆ هۆسا هزربکەی خەلكی هەمییێ، هەمان هزرێن تە هەنە، و د واقعی دا هۆسا نینە! پارتی ئەڤجارە، خوە ژ وێ گرێیا سایکۆلۆژی رزگار کر، هزربکەت خەلك هەمی، یێن ل گەل دیتا وێ. لەوا باشتر ژ جاران دیراسەتا ئەوان دیتنان کر، یێن نە ل گەل دیتنا وێ

2: پاراستنا بەرژەوەندییان:

د سالێن بوری دا، مرۆڤێ کورد هەڤرکی دناڤبەرا دوو بەرژەوەندییان دکر، یێن تایبەت و یێن گشتی، پرانییا ئالییێن کوردی، کار لسەر پاراستنا بەرژەوەندیێن تایبەتێن مرۆڤێ کورد دکر، وەکی (مۆچە و کار و پلە و پۆست) پارتی ژ ئەوان حزبان بوو، یێن هەتا رادەیەکێ کار لسەر بەرژەوەندییێن گشتی دکر، وەکی (جادە، قۆتابخانە و نەخۆشخانە و گۆتارا نەتەوەیی) بەلێ گەهشتبوو رادەیەکێ، تاکێ کورد هندی موچەیێ وی گرنگ، هندە ڤەکرنا جادەیەکێ بۆ گرنگ نەبوو، ئەنجام پتر مەیلا وی بەر ب ئالییێن دی دچوو، د ئەڤان چار مەهێن دەربازبوویی دا، پارتی هەتا رادەیەکێ، کار لسەر دابینکرنا هەردو بەرژەوەندیان دکر.

3: چێکرنا پرا دناڤبەرا سەرکردایەتییێ و خەلکی دا:

د سالێن بووری دا، پرا دناڤبەرا خەلکی و سەرکرداتییا پارتی دا، لاواز و قەیراناوی ببوو. خەلکی دەمێ بەرپرسێن پارتی د دیتن، ئێکسەر ئیمۆژییێ مۆنیکا، زێرەڤان و ڤلە و گەندەلی و ژیانەکا جۆدا دهاتە بەرچاڤ. ژ لەهیان تا نها پارتی بزاڤێ دکەت، ئەوی ئیمۆژی ب گوهۆریت. د ئەڤان هەلبژارتنان دا، هاتنا ئەندامێن مالباتا بارزان، بۆ ناڤا خەلکی و ژ نێزیك هایداربوون لسەر رەوشا خەلکی، ئەو پرە ب هێزکر، ئالییەکێ دی، دەرکەفتنا سەرۆك بارزانی و کاك نێچیرڤان و مەسرۆر، هۆسا نیشا خەلکی دا کۆ ئەم ب هێز و ئێکگرتینە.ئەگەرەکێ دی یێ ب دەستڤەئینانا دەنگان بوو.

4: گۆتارا نەرم  soft power

خوە دیرکرن ژ گۆتارا زڤر، و هەتا رادەیەکێ، ممارسەکرنا گۆتارەکا نەرم و پێگر، ب هندەك رەوشت و پرەنسیپێن کوردەواری، د هەوێن هەلبژارتنان دا، سەرنجا خەلکی بۆ خوە راکێشا، هەڤبەرییا درۆشمێن پارتی، ل گەل ئالیێن دی، پتر زمانێ دیالۆگ،  نەرین و ئارمانج و پەیامێ تێدا هەبوو، ئەڤێ ژی ئالیگرێن ئەوێ زێدە کرن.

5: چێکرنا لاشعور جمعی و هەستێ گشتی:

 چێکرنا لاشعور جمعی و رەیا گشتی، د بەرژەوەندا پارتی دا، ژبەرکۆ د هەلبژارتنان دا، تەنێ بریارێن ئەقلانی، دیتنا دەنگدەری نا گوهەرن، بەلکی عاتیفە و هەستان، رۆلەکێ مەزن د گوهەرینا بریارێن دەنگدەری دا هەیە! ل گۆری لێکۆلینان، هاتییە سەلماندن، دەمێ دەنگێ خوە ددەین، هندەك پشکێن مەژی، چالاك دبن کۆ گرێدای عاتیفێ یە، د پزیشکییا کەڤن دا د گۆتنێ (ئەمیگدالا) ئان تیفکلێ مەژی، پارتی شیا ب شەهرەزایی ئەڤی هەستێ گشتی یێ خەلکی ب ئازرینیت، ب رێکا ئەشیرەت، هونەر و وەرزش و راگەهاندنێ.

6: هەبوونا مەترسیان:

ل گۆری زانستێ مێشکناسییێ، هەبوونا  مەترسی و ئاستەنگان لسەر ئاسایشا مرۆڤی، ئێك ژ ئەگەرێن کاریگەر یێن گوهۆرینا دەنگێ دەنگدەرییە. ئەو ژی دەمێ تۆ بۆ ئەوی د سەلمینی، یێ ئاسایشا تە د پارێزیت ژ دەستدرێژیا دۆژمنی ئەزم! پارتی شیا د ئەڤان هەلبژارتنان دا، بۆ خەلکی ب سەلمینیت کۆ یێ تە د پارێزیت هەر پارتییە! بەختێ پارتی تەوقیتا هەلبژارتنان، کەتنە د مەها شکۆیا پارتی دا بەرامبەر داگیرکەران، وەکی ١٦ی ئۆکتۆبەر و داستانێن پردێ و سحێلا.

7: لاوازیا رەفتارا سیاسی:

لاوازیا رەفتار و گۆتارا سیاسی یا بەرهەلستکارێن پارتی، بۆ سەدەما بهێزکرنا دەنگێن پارتی! فردەریك نیتچە دبێژیت: دەمێ شەرێ درندەی دکەی، یێ هشیاربە نە بییە درندە! بەرهەلستکارێن پارتی، ل سالێن بووری و د هەلبژارتنان دا ژی، نەشیان میتۆدەکێ جۆدا ژ یێ پارتی ممارسەبکەن، رەخنەگرتنا ئەوان ژ پارتی کۆ حزبەکا بنەمالەییە، ئەوان ژی ممارسەیا هەمان رەفتارێ کر و خراپتر! دەمێ دخوازی پرۆسەیەکێ ب گوهۆری، دڤێت ئالاڤ و میتۆدێن گوهۆرینا پرۆسەیێ ژی جۆدا و نوو بن! گۆتارا کەرب و کینا هندەك ئالییان،  وێنەیەك بۆ خەلکی چێکر، کۆ ئەڤان دڤێت تۆلەکا دیرۆکی د زەمەنێ بووریدا ژ پارتی ڤەکەن، نە رەوشێ ب گوهۆرن! ئالییەکێ دی، ئەو پەیڤ و درۆشم و رەفتارێن د ئەڤان هەلبژارتنان دا هاتینە کرن، یێن بەری پەیدابوونا باژێر و مەدەنیەتێ بوون، درۆ و هەرفاندن و …هتد. ئەڤە یێن قۆناغا ئەشیرەتگێری و پاتریارکییەتێ نە. هەتا گەهشتییە ئەوی رادەی من گەلەك جاران، د گۆتە هەڤالێن خوە: ئەڤە یێ ریکلاما پارتی دکەن!

8: ئالیگری بۆ یێ ب هێز:

  مرۆڤ ب سرۆشتێ خوە، حەزدکەت ئالیگرێ یێ ب هێز بیت، هالایەك ب دیراسەت و ئەقلانی بۆ پارتی هاتە چێکرن، کۆ حزبەکا ب هێز و بێ هەڤرکە. ئەڤێ خەلك پتر راکێشا کۆ بەر ب ئالیگرییا پارتی بچن، نموونە لدۆر ئەڤێ چەندێ، ل سالا ٢٠٠٩ راپرسییەك لسەر کۆمەکا کەسان هاتە کرن، هۆسا د ئەوێ راپرسییێ دا دیارکربوو، کۆ فلانە کاندید یێ ب هێزە و گەلەك ئالیگر هەنە، ئەنجامێ راپرسییێ، رێژەیەکا باشا خەلکی ژ بریارێن خوە لێڤە بوون و بوونە ئالیگرێن ئەوی کاندیدی، یێن گۆتین یێ ب هێزە! پارتی خوە د هەلبژارتنا درۆشمێن خوەدا ژی، ئەڤ هێزییە دا دیارکرن. و د هەمان دەمی دا، ئستغلالا دەرونێ مرۆڤی هاتبوو کرن، مرۆڤ د سرۆشتێ خوەدا حەز ژ هیڤی و ئومێد و ئەرینییێ دکەت، درۆشمێن پارتی ئەڤ هەستە دانە خەلکی.

9: شکاندنا وێنەیێ غرۆرێ:

شکاندنێ ئەوان سنوران، یێن هوسا دهاتنە بەرچاڤ، پارتی حزبەکا بێ منەت و غرۆرە، هاتنا دناڤ خەلکی دا و گوهۆرینا ئەوێ هزرێ، لدەف خەلکی ئەگەرەکێ دی یێ دەرکەفتنا پارتی بوو.

خالێن لاواز

ئێك: بلندبوونا دەنگێن نەوەیێ نوێ، ئاماژەیە بۆ ئەوێ چەندێ کۆ خەلک، تایبەت رێژەیەکا گەنجان، ژ ڤی تەرزێ سیاسەتێ د رازی نینن، و حەزەکا هەی، بۆ ریفۆرم و چاکسازییێ، سەرەرای ئەوێ چەندێ، یا زەلال نینە، کۆ ب کریار و دیتن و ئارمانج نەوەی نوی، هەلگرا پرۆژێ چاکسازییێ بیت. وەکی دروشم وئاخفتن ئەوێ ئیدیعایێ دکەت، بەلێ ب کریار! دەمێ مرۆڤ تەماشەی، دەنگێ رەخنە و نە رازیبوویێن وێ حزبێ دکەت، دزانیت کۆ هەتا رادەیەکێ باش، ئیدیعا ب چاکسازییێ هەیە پتر ژ راستییێ! دۆراندنا تەڤگەرا گۆرانێ، بەلگەیا ئەڤێ چەندێ یە، دەمێ چاکسازی، بۆ پارتەکێ وەسیلە و ئالاڤ بیت نە دۆز، ئەگەرێ دۆراندنێ هەیە! بەلێ ئەڤە ئێک ژ خال و ئاستەنگانە، ل هەمبەری پارتی د پاشەرۆژێ دا، لەوا دڤێت خوە ب گوهۆریت و چاکسازییێن رژد بکەت.

دوو: خەلک تێهنی یێ میتۆد، گۆتار و ئاوایەکێ جۆدا، یێ خەباتێ یە، هەر پشتبەستن لسەر جۆشدانا ئەشیرەتگێرییێ، تێنکا گەنجەکێ سەردەم ناشکێنن، لەوا دڤێت پتر بەر ب گۆتارەکا سەردەم بچیت، کۆ خەلک لسەر بنەمایێ بەرنامە، دیتن و پەیام و ئارمانجێ، دەنگێ خوە بدەنێ.     

سێ: ئینانا پێشا گەنجێن خۆدان هزر و کەسایەتی، بەرنامە وئارمانجێن پارتی ب ئاوایەکێ سەردەم ، زانستی و هزری، ب ریک و ئالاڤێن جۆدا بدەنە خۆیاکرن، ئەڤ گۆتارا د شانازیێن زەمەنێ بووریدا دژیت، بهێتە گوهۆرین بۆ دەستکەفت و شانازییێن نوکە. ژبەرکۆ ئێک ژ پرسیارێن جەوهەری، کۆ پیدڤییە پارتی هەردەم ل خوە بکەت ئەوە، پارتی ژ رەوشا شورەشی بۆ بەر ب دامەزراندنا حکۆمەت و سازیکرنێ د چ دا خوە جۆدا کرییە؟

چار: دیتن و جیهانبینیی یا پارتی، دڤێت یا زەلال و روهن بیت بۆ پاشەرۆژێ ، بۆ پارتی ب خوە و ئەوێن باوەری ب رێبازا پارتی هەی، دێ چ پاشەرۆژەک هەبیت؟