گاڤ

جڤاتا نوینەرێن ئیراقێ ئەڤرۆ رۆژا سێشەمبی دێ کۆم بیت و پێنج خال د کارنامەیا روینشتنێ دا هەنە.

جڤاتا نوینەرێن ئیراقێ ئەڤرۆ رۆژا سێشەمبی دێ کۆم بیت و ل گۆرەی کارنامەیا روینشتنێ، دێ دەنگ ب پێنج پرۆژە و پێشنیازە یاسایان هێتە دان. پرۆژەیاسا ئێکێ یا دێ دەنگ ل سەر هێتە دان، گرێدای ڤەگەڕاندنا وان مولکانە یێن ب بریارێن جڤاتا سەرکرداتییا شۆرەشێ یا ژناڤچووی ژ وەلاتییان هاتینە وەگرتن و ئەگەر ئەڤ پرۆژەیە پەسەند ببیت، کورد و تورکمانێن کەرکووکێ دێ ژێ دمفادار بن.

د خالا دویێ یا کارنامەیا روینشتنا ئەڤرۆ دا، دێ دەنگ ل سەر پێشنیازا یاسایا بارێ کەسایەتی یا ژمارە 188 یا سالا 1959ێ ماددەیێن (2 و 10) هێتە دان.

د خالا سێیێ یا کارنامەیێ دا دێ دەنگ ب پرۆژەیاسایا راستڤەکرنا دویێ یا یاسایا لێبۆرینا گشتی یا ژمارە 27 یا سالا 2016ێ هێتە دان.

خالا چارێ یا کارنامەیا روینشتنێ دەنگدانە ب پرۆژەیاسا خزمەت و خانەنشینکرنا چەکدارێن حەشدا شەعبی یە.

خالا پێنجێ و دویماهییێ یا کارنامەیا روینشتنێ تەمامکرنا خواندنا ئێکێ یا پرۆژەیاسایا  مولکییا هزری یە.

هەرچەندە بریاربوو پێر جڤاتا نوینەران دەنگی ب ڤان پرۆژە و پێشنیازە یاسایان بدەت، لێ ژبەر رێکنەکەفتنا ئالییێن سیاسی ل سەر هەرسێ خالێن دەستپێکێ یێن کارنامەیا روینشتنێ، روینشتن هاتە پاشخستن.