گاڤ

پشتى نێزیكى ساله‌كێ ژ ڤالابوونا پۆستێ سه‌رۆكاتیا په‌ڕله‌مانێ ئیراقێ و رێڤه‌برنا ب وه‌كاله‌ت، ئه‌ڤ شه‌ڤه‌ مه‌حموود مه‌شهه‌دانى وه‌كو سه‌رۆكێ نه‌هێ یێ په‌رله‌مانێ ئیراقێ هاته‌ هه‌لبژارتن.

ئه‌ڤرۆ كۆمبوونا جڤاتا نوینه‌رێن ئیراقێ ب ئاماده‌بوونا پتر ژ 270 ئه‌ندامان و ل ده‌مژمێر (4:30) برێڤه‌چوو، پرۆسه‌یا ده‌نگدانێ بۆ هه‌لبژارتنا سه‌رۆكێ په‌رله‌مانى هاته‌ كرن كو هه‌ر ئێك ژ سالم عیساوی، تەلال زوبەیعی، مەحمود مەشهەدانی، عامر عەبدولجەبار هه‌ڤڕكى لسه‌ر بده‌ستڤه‌ئینانا وى پۆستى دكرن، مه‌حموود مه‌شهه‌دانى(153)ده‌نگ بده‌ستڤه‌ئینان. هه‌ر ئێك ژ سالم عیساوی (95) و تەلال زوبەیعی (سفر) و عامر عەبدولجەبار ژى (9) دەنگ بده‌ستڤه‌ئینان و (14) ده‌نگ پۆچه‌ل هاتنه‌ هژمارتن.

ژبه‌ركو د گه‌ڕا ئێكێ دا ژ 4 به‌ربژاران چ ژ وان ده‌نگێن پێدڤى بده‌ستڤه ‌نه‌ئینان، هه‌ر ئه‌ڤ شه‌ڤه‌ و د گه‌ڕا دووێ یا ده‌نگدانێ دا كو 269 په‌ڕله‌مانتار ئاماده‌ ببوون و هه‌ڤڕكى دناڤبه‌را مه‌حموود مه‌شهه‌دانى و سالم عیساوى دا بوو، مه‌حموود مه‌شهه‌دانى وه‌كو سه‌رۆكێ نوى یێ په‌ڕله‌مانێ ئیراقێ ب 168 ده‌نگان هاته‌ هه‌لبژارتن.