سێ گوهۆڕین
بەلاڤ بکە
تەنیا کوردی
ل دەما نێچیرڤان بارزانی، سەرۆکێ هەرێما کوردستانێ د دیدارا مێری دا گۆتارەکا ژیواری یا سیاسی وەک نەخشەڕێیا پاشەرۆژا هەرێمێ پێشکێش کری، شرۆڤەکاران وەک گوهۆڕینەک د پێشڤەچوونا سیاسەتا هەرێمێ دا بەرێ خۆ دایێ، لێ ل پشت ڤێ پەیاما سەرۆکێ هەرێما کوردستانێ، مۆدێلەکا سیاسی یا نوی هەبوو کو هەرێم خۆ بۆ قووناغەکا زێدەتر ئێکگرتی ئامادە بکەت.
خالا سەرەکی د ڤێرێ دا تێگەهشتنە بۆ تێگەهێن "ئایدیۆلۆژییا سیاسی" و "ژیوارێ سیاسی"، تێگەهێ ئێکێ بزاڤان دکەت ژیوارەکی بگونجینیت ل گەل تیۆرییێ ب خۆ، تێگەهێ دویێ دخوازیت تیۆرییەکێ ژ ژیواری دروست بکەت. ئەڤە هەر ئەو گوهۆڕین بوون کو پشتی جەنگێ جیهانی یێ دویێ ل ئەورۆپا چێبووین.
سەرۆکێ هەرێما کوردستانێ د ژیوارێ سیاسی دا مۆدێلەکا پراگماتیک داهێنایە و ئاماژەیا سەرکەفتنێ ددەتە پێش هەر ئەگەرەکی کو ل گەل ڤان سێ پیڤەران بیت.
ئێک: گوهۆڕین پیڤەرێ سەرکەفتنێ یە
د جیهانا بەرێ دا، سەرکەفتن ب شکەستنا لایەنێ بەرانبەر دهاتە پیڤان. د جیهانا نوی دا، سەرکەفتن ب راددەیێ شیانان بۆ دروستکرنا سیستەمەکێ کارا دهێتە پیڤان. ئەڤە هەر ئەو سەربۆڕە یا ئەلمانیا و فرەنسا پشتی جەنگی ژێ فێربووین.
دو: چارەیا کێشەیێن نەتەوەیی
نێچیرڤان بارزانی، سەرۆکێ هەرێما کوردستانێ سەربۆڕەکا کویر هەیە کو کێشەیێن نەتەوەیی نابیت بتنێ ب چارەیا سیاسی زەمینە بۆ بهێتە خۆشکرن. ئەو بزاڤان دکەت مۆدێلەکا نوی پێشکێش بکەت کو تێدا بەرژەوەندییێن ئابۆری د نشتیمانی دا ببنە بنیاتێ پەیوەندییان. ئەڤە هەر ئەو رێکە یا مالیزیا گرتییە بەر.
سێ: گوهۆڕینا پێناسەیا دەستهەلاتێ
ل جهێ کو وەک دەستهەلاتەکا رەها بەرێ خۆ بدەینە دەستهەلاتێ، سەرۆکێ هەرێما کوردستانێ دخوازیت دەستهەلاتێ بکەتە ئەرکەکێ بەرپرسیارانە. ئەڤە نێزیکی وێ مۆدێلێ یە یا وەلاتێن سکەندەناڤی پەیرەو دکەن.
بۆچی نوکە ئەڤ مۆدێلە یا گرنگە؟
- گوهۆڕینا هێزێ د دەڤەرێ دا
دەڤەر یا د گوهۆڕینێن مەزن دا و کوردستان نەشێت خۆ ژ ڤان گوهۆڕینان دویر بکەت.
- گوهۆڕینا نڤشان
نڤشێ نوی یێ هەرێمێ، داخوازییێن نوی هەنە و د شیان دا نینە هەرێم هەر ب شێوازێ بەرێ بهێتە بڕێڤەبرن.
- گوهۆڕینێن ئابۆری
دەربازبوون ژ سیستەمێ کەڤن بۆ سیستەمەکێ پێشکەفتی. لەورا سەرۆکێ هەرێمێ داخوازا مۆدێلەکا نوی دکەت.
- دانوستاندنێن بەردەوام
دانوستاندن نە وەک تەکتیک، بەلکو وەک ستراتیژی.
- پەروەردەیەکا نوی
وەبەرهێنان د سەرمایا مرۆڤی دا وەک کلیلا پێشکەفتنێ.
- گوهۆڕینا گۆتارێ
رەتکرنا گۆتارا دوژمندارییێ و گوهۆڕینا گۆتارا هەمی ئالییان بۆ هەڤپشکییێ.
- بنیاتنانا سازییان
سازییێن بهێز وەک گەرەنتییا سەقامگیرییێ.
گۆتار و بزاڤێن سەرۆکێ هەرێما کوردستانێ، دیار دکەن کو کوردستان د خالەکا وەرچەرخانا دیرۆکی دایە. یان دڤێت خۆ ل گەل گوهۆڕینان بگونجینیت، یان ژی دێ بیتە قوربانییا وان گوهۆڕینان. سەربۆڕێن دیرۆکێ وەسا نیشا مە دایە کو چ دەڤەر نەشێن ب درێژییا دەمی خۆ ژ گوهۆڕینان دویر بکەن.
ئەگەر ئەڤ بزاڤە دسەرکەفتی بن، د شیان دایە هەرێم بۆ دەڤەرێ هەمییێ ببیتە نموونەیەک. ئەگەر شکەستنێ تێدا بینیت، دبیت ئەڤە ببیتە نموونەیەکا نوی یا دەلیڤەیێن ژدەستچوویی د رۆژهەلاتا ناڤین دا. ل دویماهییێ، وەک ماندێلا دبێژیت: "هەمی دەمان تشتەک ب مەحال دهێتە دیتن، تا ئەو دەمێ دهێتە کرن."
