گاڤ

سەرۆک مەسعوود بارزانی و ستیڤن هیتچن، بالیۆزێ بریتانیا ل ئیراقێ کۆمبوون، بالیۆزێ بریتانیا پیرۆزباهییا سەرکەفتنا پرۆسەیا هەلبژارتنێن پەرلەمانێ کوردستانی ل سەرۆک بارزانی کر.

ل گۆرەی بارەگەهێ بارزانی، ئەڤرۆ سەرۆک مەسعوود بارزانی، پێشوازی ل ستیڤن هیتچن، بالیۆزێ بریتانیا ل ئیراقێ کر و د کۆمبوونێ دا سەرۆک بارزانی دوپات کر و راگەهاند؛ پارتی بۆ پێکئینانا حکومەتێ ڤیتۆ ل سەر کەسێ نینە و پێدڤییە گۆتوبێژ د چارچووڤەیێ ئێک هەرێم، ئێک پەرلەمان، ئێک حکومەت و ئێک هێزا پێشمەرگەی دا بن.

د کۆمبوونێ دا کو ئاندرۆ بیزلی کۆنسۆلێ ل بریتانیا ل هەولێرێ ژی یێ بەرهەڤبوو، بالیۆزی بریتانیا پیرۆزباهییا سەرکەفتنا پرۆسەیا هەلبژارتنێن پەرلەمانێ کوردستانێ و رێژەیا پشکدارییا وەلاتییان د دەنگدانێ دا و ب رێڤەچوونا پرۆسێ د کەشەکێ ئارام دا ل سەرۆک بارزانی کر و ژ لایێ خۆ ڤە سەرۆک بارزانی سوپاسییا گەلێ کوردستانێ کر کو ب وێ رێژەیا بلند پشکداری د دەنگدانێ دا کری.

بارەگەهێ بارزانی دا زانین ژی: دانوستاندنێن گرێدای ل پێکهاتە و ئەجندایێن حکومەتا داهاتی یا هەرێما کوردستانێ تەوەرەکێ دی یێ کۆمبوونێ بوون.

 دیار ژی کر: هەر د کۆمبوونێ دا هزر و بیر دەربارەی دەرئەنجامێن هەلبژارتنێن ئەمریکا و کارتێکرن لسەر هاوکێشەیا جیهانێ و دەڤەرێ هەروەسا رەوشا سیاسی یا ئیراقێ و هەلبژارتنێن سەرۆکێ جڤاتا نونەرێن ئیراقێ لهەڤگۆهارتن.